नेपाल स्पोर्ट्स एण्ड इभेन्ट म्यानेजमेन्ट प्रालिले वैशाखमा आयोजना गर्न लागेको नेपाल सुपर लिग फुटबल प्रतियोगिताका लागि आज बिहान ११ बजेदेखि खेलाडी लिलामी अर्थात् अक्सन हुँदै छ ।
नेपालमै पहिलोपल्ट शहरको नामबाट फ्रेन्चाइज टिम निर्माण गरी प्रतियोगिता आयोजना हुन लागेको हो । चौधरी ग्रुपको यस प्रतियोगिताका लागि ७ वटा शहरका नामबाट टोली निर्माण भइसकेका छन् ।
काठमाडौं रेजर्स, ललितपुर एफसी, पोखरा थन्डर्स, चितवन सिटी एफसी, बुटवल लुम्बिनी एफसी, विराटनगर सिटी एफसी र धनगढी एफसी गरी ७ टोलीले आजको अक्सनमा विभिन्न समूहको वर्गीकरणमा परेका १५८ जना खेलाडीका लागि बोली लगाउनेछन् ।
अक्सनमा ए, बी र सी गरी खेलाडीहरूलाई ३ समूहमा वर्गीकरण गरिएको छ । राष्ट्रिय टोलीबाट खेलेका खेलाडीलाई ए श्रेणीमा राखिएको छ । ए डिभिजन लिग खेलेका बी श्रेणी र अन्य खेलाडीहरू सी श्रेणीमा रहनेछन्, जसमा ३५ जना ए श्रेणीमा, ६५ जना बी श्रेणीमा र बाँकी सी श्रेणीमा छन् ।
एउटा क्लबले अक्सनमा घटिमा १० लाखदेखि बढीमा १५ लाख ५० हजार रुपैयाँसम्म खर्च गर्न पाउनेछन् । एउटा क्लबले ए श्रेणीका बढीमा ३ जना खेलाडी किन्न पाउनेछन् । बी र सीका गरी ११ खेलाडी किन्न पाउनेछन् ।
एउटा फ्रेन्चाइज टोलीमा २० खेलाडी रहनेछन् । अक्सनबाट आएका १४, मार्की खेलाडी १, विदेशी खेलाडी ३ जना र स्थानीय खेलाडी २ जना रहनेछन् ।
सबै क्लबहरूले मार्की खेलाडी र प्रशिक्षकको टुंगो लगाइसकेका छन्, जसअनुसार काठमाडौंको मार्की खेलाडीमा गोलरक्षक विकेश कुथु, ललितपुरमा स्ट्राइकर अन्जन विष्ट, पोखरामा स्ट्राइकर नवयुग श्रेष्ठ, चितवनमा स्ट्राइकर भरत खवास, बुटवलमा गोलरक्षक विशाल श्रेष्ठ, विराटनगरमा डिफेण्डर रन्जित धिमाल र धनगढीमा मिडफिल्डर विशाल राई छन् ।
