न्युजिल्यान्ड र अस्ट्रेलियामा भइरहेको फिफा महिला विश्वकपमा अर्जेन्टिनाले सम्भावित हार टार्दै अन्तिम १६ मा पुग्ने संभावना कायमै राखेको छ । 

शुक्रबार न्युजिल्यान्डमा भएको समूह ‘जी’को खेलमा अर्जेन्टिनाले दक्षिण अफ्रिकासँग २-० गोलले पछि पारेको स्थिति उल्टाउँदै २-२ गोलको बराबरी खेलेको हो । 

दक्षिण अफ्रिकाका लागि लिन्डाले ३०औँ मिनेटमा पहिलो गोल गर्दा ६६ मिनेटमा थेम्बीले अग्रता दोब्बर पारिन् ।

तर, अर्जेन्टिनाले ५ मिनेटको अन्तरमा २ गोल गर्न सक्यो । ७४ मिनेटमा अर्जेन्टिनाका लागि सोफिया ब्रनले पहिलो गोल गर्दा रोमिना नुनेजले ७९ मिनेटमा बराबरी गोल गरिन् । 

यससँगै दक्षिण अफ्रिकाले भने महिला विश्वकपको इतिहासमा पहिलो जित निकाल्ने अवसर भने गुमाएको छ । पहिलो खेलमा अर्जेन्टिना इटालीसँग पराजित भएको थियो।

फिफा वरीयताको २८औँ स्थानमा रहेको अर्जेन्टिनाले समूहको अन्तिम खेलमा तेस्रो वरीयताको स्विडेनसँग खेल्नेछ । सो खेलमा जित निकाले मात्र अर्जेन्टिना अन्तिम १६ मा पुग्नेछ ।