फिफा विश्वकप फुटबल र एएफसी एसियन कप, २०२७ को एसिया छनोटको प्रारम्भिक चरणमा नेपालले लाओसको सामना गर्ने भएको छ ।  मलेसियाको क्वालालम्पुरस्थित एसियाली फुटबल महासङ्घ (एएफसी)को मुख्यालयमा आज सार्वजनिक खेल तालिकाअनुसार नेपालले दोस्रो चरणमा प्रवेश गर्न लाओसको सामना गर्ने पक्का भएको हो । नेपालले लाओससँग होम एन्ड अवे गरी दुई खेल खेल्नेछ । 

आगामी अक्टोबरमा हुने दुई लेगको छनोटको पहिलो लेग अक्टोबर १२ मा हुनेछ भने दोस्रो लेग अक्टोबर १७ मा हुनेछ । यस खेलमा नेपालले विजय हासिल गरेमा दोस्रो चरणमा प्रवेश गर्नेछ । फिफा विश्वकप छनोटमा विभिन्न ४८ वटा राष्ट्रले प्रतिस्पर्धा गर्नेछन् । 

त्यस्तै, एसियन कप छनोटमा भने २४ वटा राष्ट्रबीच प्रतिस्पर्धा हुनेछ । विश्वकप फुटबल र एएफपी एसियन कप छनोटको पहिलो चरणमा विभिन्न २० वटा राष्ट्रले खेल्नेछन् ।

यसमा नेपाल र लाओससँगै अफगानिस्तान र मङ्गोलिया, माल्दिभ्स र बङ्गलादेश, सिङ्गापुर र गुआम, यमन र श्रीलङ्का, म्यानमार र मकाउ, कम्बोडिया र पाकिस्तान, चाइनिज ताइपेई र इस्ट टिमोर, इन्डोनेसिया र बु्रनाई तथा हङकङ र भुटानबीच प्रारम्भिक चरणमा प्रतिस्पर्धा हुनेछ ।