शहीद स्मारक ए डिभिजन लिग, २०७९-०८० मा पूर्वच्याम्पियन नेपाल पुलिस क्लबले पहिलो जित हात पारेको छ ।
अंक तालिकाको पुछारमा रहेको पुलिसले आफूभन्दा १ स्थान अघि रहेको फ्रेन्ड्स क्लबमाथि ३-१ गोलको जित हात पारेको हो ।
एन्फा कम्प्लेक्स सातदोबाटोमा भएको खेलमा पुलिसको जितमा घानाका खेलाडी मोसेस युमले डेब्यु खेलमा गोल गर्दा बुद्धबल तामाङले २ गोल गरे ।
पहिलो हाफ गोलरहित बराबरीमा सकिएको खेलको ५१ मिनेटमा मोसेसले गोल गर्दै पुलिसलाई अग्रता दिलाए ।
खेलमा पुलिसले पहिलो पटक २ जना विदेशी खेलाडी खेलाएको थियो । खेलमा मोसेससँगै जोइ आइडो खेलेका थिए ।
लिगमा लगातार खराब प्रदर्शनपछि पुलिसले विदेशी खेलाडी आबद्ध गरेको हो । विदेशी खेलाडी आबद्ध गरेको पहिलो खेलमै पुलिसले सिजनमा पहिलो जित निकाल्न सफल भयो ।
पुलिसका लागि बुद्धबलले ५८ मिनेटमा अग्रता दोब्बर पारे ।
फ्रेन्ड्सका टोरिक जेब्रिनले ८७ मिनेटमा गोल फर्काए तर बुद्धबलले ९० मिनेटमा तेस्रो गोल गर्दा पुलिस जिततर्फ अघि बढ्यो ।
अंक तालिकाको १४औँ अर्थात् पुछारमा रहेको पुलिसले ४ अंक जोडेको छ । पुलिसले ७ खेलमा ५ खेलमा हार बेहोर्दा १/१ खेलमा जित र बराबरी खेलेको छ । यता, १३औँ स्थानको फ्रेन्ड्सले पनि ४ अंक जोडेको छ भने गोलअन्तरमा पुलिसभन्दा अघि छ ।
यता, दशरथ रंशगालामा भएको खेलमा चर्च ब्वाइज युनाइटेड र नेपाल एपीएफ क्लबले गोलरहित बराबरी खेल्दै अंक बाँड्न बाध्य भएका छन् ।
लिगमा चर्च ब्वाइज ७ खेलबाट १३ अंक जोडेर तेस्रो स्थानमा उक्लिएको छ । पाँचौँ स्थानको एपीएफको ११ अंक भएको छ ।
