अर्को वर्ष पेरिसमा हुने पेरिस २०२४ ओलम्पिकअन्तर्गत महिला फुटबलको एसियन छनोट राउन्ड वानको नेपालले आज भियतनामसँग दोस्रो खेल खेल्दै छ ।

समूह 'सी'मा २ टिम मात्र रहेकाले नेपाल र भियतनामले एकआपसमा २ खेल खेल्न लागेका हुन् ।

नेपाल र भियतनामबीचको खेल दशरथ रंगशालमा साँझ ६ बजे सुरु हुनेछ । यसअघि बुधबार भएको पहिलो खेलमा नेपाल भियतनामसँग ५-१ ले पराजित भएको थियो ।

२ खेलपछि समग्रमा विजेता हुने टोली समूह विजेता बन्दै दोस्रो चरणमा पुग्नेछ । नेपालले समूह विजेता बन्न भियतनामलाई कम्तीमा ४ गोल अन्तरले हराउनुपर्नेछ । तर, विश्वकप खेल्न लागेको भियतनामविरुद्ध नतिजा उल्टाउन नेपालका लागि सहज भने छैन ।

पहिलो खेलमा सुरुआतमै पाएको अवसर सदुपयोग गर्न नसक्दा नेपालले ५ गोल खाएको थियो । नेपालका लागि दोस्रो हाफमा सावित्रा भण्डारीले १ गोल फर्काएकी थिइन् । पहिलो चरणको छनोटबाट ७ समूहका विजेता दोस्रो चरणमा प्रवेश गर्नेछन् ।

एसियाबाट पेरिस ओलम्पकिमा २ टिम मात्र छनोट हुनेछन् ।