यूईएफए च्याम्पियन्स लिगको क्वार्टरफाइनल प्रवेशका लागि दोस्रो लेगमा आज (बुधबार) राति २ महारथी क्लब रियल मड्रिड र पेरिस सेन्ड जर्मेन (पीएसजी)बीच प्रतिस्पर्धा हुँदै छ ।
स्पेनिस लिग लिडर रियलको घरेलु मैदान सान्टियागो बर्नाबेउमा हुने खेल नेपाली समयअनुसार राति पौने २ बजे सुरु हुनेछ । यसअघि १६ फेब्रुअरीमा भएको पहिलो लेगमा फ्रेन्च लिग लिडर पीएसजीले घरेलु मैदानमा १-० को अग्रता बनाएको थियो ।
स्टार खेलाडी लियोनल मेस्सीले पेनाल्टी चुकाएको खेलको अन्तिम समयमा केलियन एम्बाप्पेले गोल गर्दै घरेलु टोलीलाई अग्रता दिलाएका थिए ।
क्वार्टरफाइनल प्रवेशका लागि पीएसजीलाई बराबरी काफी छ भने रियललाई कम्तिमा २-० को जीत हात पार्नुपर्नेछ । यदि खेल बराबरीमा समाप्त भए पीएसजी अन्तिम ८ मा स्थान बनाउनेछ ।
यसैले घरेलु मैदानमा रियल पूर्ण रूपमा दबाबमा हुनेछ । पीएसजीविरुद्ध रियलका कासेमिरो र टोली क्रुस दुवै उपलब्ध हुनेछैनन् । कासेमेरो निलम्बनमा परेका छन् भने क्रुस ह्यामस्ट्रिङको समस्याबाट गुज्रिएका छन् । इडुआर्डाे कामाभिङ्गा र फेडेरिको भाल्भर्डे भने उपलब्ध हुनेछन् ।
कार्लाे एन्सेलोटीको टिममा करिम बेन्जेमा, भिनिसिअस जुनियर, मार्काे एसेन्सियो, लुका मोड्रिकलगायत खेलाडी उपलब्ध हुनेछन् ।
यता, माउरिसियो पोचेटिन्होको टोलीमा चोटका बाबजुद पनि केलियन एम्बाप्पे मैदान उत्रँदै छन् । अभ्यास क्रममा खुट्टाको चोट बोकेका एम्बाप्पे खेल्दा रियलका पूर्वकप्तान सर्जियो रामोस भने उपलब्ध हुनेछैनन् । पहिलो लिगमा समेत रियलविरुद्ध खेल्न नपाएका रामोस् दोस्रो लेगमा समेत टिमबाहिर छन् ।
रियलविरुद्ध पीएसजीको अग्रपंक्ति नेयमार, लियोनल मेस्सी र एम्बाप्पेले नै सम्हाल्ने सम्भावना उच्च छ । यस्तै, उनीहरूलाई मार्काे भेराट्टी, इड्रिसा गुयेले सहायता गर्नेछन् ।
आज राति एकै समयमा हुने अर्काे खेलमा म्यानचेष्टर सिटी र स्पोर्टिङ सीपीबीच प्रतिस्पर्धा हुनेछ । इंग्लिस प्रिमियर लिग लिडर सिटीले पोर्चुगिज क्लबविरुद्ध पहिलो लेगमै ५-० को अग्रता बनाएको छ । दोस्रो लेगमा समेत सिटी घरेलु मैदानमा सहज जीतको खोजीमा हुनेछ ।
