इन्डियन प्रिमियर लिग (आईपीएल) क्रिकेटमा दिल्ली क्याटपिल्सले तेस्रो जीत निकालेको छ । चेन्नाईमा मंगलबार राती भएको खेलमा साविक विजेता मुम्बई इन्डियन्सलाई ६ विकेटले पराजित गर्दै दिल्लीले तेस्रो जीत निकालेको हो ।

मुम्बईले दिएको १३८ रनको लक्ष्य दिल्लीले १९ ओभर १ बलमा ४ विकेट गुमाएर भेट्टाएको हो । दिल्लीको जीतमा शिखर धवनले सर्वाधिक ४५ रन बनाएका छन् ।

स्टिभ स्मिथले ३३ रन जोड्दा ललित यादव २२ रनमा अविजित रहे । कप्तान रिषभ पन्त र पृथ्वी साले समान ७-७ रन जोडेर आउट भए । सिम्रन हिटमेयरले अविजित १४ रन बनाए । जस्प्रित बुम्राह, जयन्त यादव, राहुल चाहर र काइरन पोलार्डले १-१ विकेट लिएका थिए ।

यसअघि टस जितेर पहिले ब्याटिङ गरेको मुम्बईले २० ओभरमा ९ विकेट गुमाएर १३७ रन बनाएको थियो । जीतसँगै दिल्ली लिगको दोस्रो स्थानमा उक्लिएको छ । दिल्लीले ४ खेलबाट ६ अंक जोडेको छ । दोस्रो हार बेहोरेको मुम्बईले ४ खेलमा ४ अंक जोडेको छ ।