राजस्थान रोयल्सलाई पराजित गर्दै चेन्नाई सुपर किङ्सले इन्डियन प्रिमियर लिग (आईपीएल) क्रिकेटमा दोस्रो जीत हात पारेको छ ।
सोमबार राती भएको खेलमा चेन्नाइले राजस्थानलाई ४५ रनले पराजित गर्दै लगातार दोस्रो जीत हात पारेको हो । पहिलो खेलमा दिल्लीसँग पराजित चेन्नाइले त्यसपछि पञ्जाब किङ्सलाई पराजित गरेको थियो ।
चेन्नाइले दिएको १८९ रनको लक्ष्य पछ्याएको राजस्थानले २० ओभरमा ९ विकेट गुमाएर १४३ रन मात्र बनाउन सक्यो । राजस्थानका लागि ओपनर जोस बट्लरले सर्वाधिक ४९ रन बनाए । जयदेव उनादकडले २४ र राहुल टेवाटियाले २० रन बनाए ।
चेन्नाइका मोइन अलीले ३ विकेट लिए भने साम करन र रविन्द्र जडेजाले २-२ विकेट लिए ।
यसअघि टस हारेर पहिले ब्याटिङ गरेको चेन्नाइले २० ओभरमा ९ विकेट गुमाएर १८८ रन बनाएको थियो ।
चेन्नाइका लागि ओपनर फाप डु प्लेसिसले सर्वाधिक ३३ रन बनाए । अम्बाती रायडुले २७ र मोइन अलीले २६ रन जोडे । ड्वेन ब्राभो २० रनमा अविजित रहे । कप्तान महेन्द्रसिंह धोनी र सुरेश रैनाले समान १८ रन बनाए ।
राजस्थानका चेतन साकरियाले ३ तथा क्रिस मोरिसले २ विकेट लिए ।
जीतपछि ३ खेलबाट ४ अंक जोडेको चेन्नाई अंक तालिकामा दोस्रो स्थानमा उक्लिएको छ । समान अंक भएपछि चेन्नाईले दिल्ली क्यापिटल्स र मुम्बई इन्डियन्सलाई रनरेटमा पछि पारेको हो ।
राजस्थानको यो दोस्रो हार हो । ३ खेलमा २ अंक जोडेको राजस्थान छैटौँ स्थानमा रहेको छ ।
