जारी इन्डियन प्रिमियर लिग (आईपीएल)मा चेन्नाई सुपर किंग्सले जीत हात पारेको छ ।

१४औँ संस्करणमा पहिलो जीत हात पार्दै चेन्नाईले पञ्जाब किंग्सलाई ६ विकेटले पराजित गरेको हो ।

मुम्बईस्थित वाङखडे स्टेडियममा भएको खेलमा पञ्जाबले दिएको १०७ रनको लक्ष्य चेन्नाईले १५.४ ओभर खेल्दै ४ विकेट गुमाएर पूरा गरेको हो । चेन्नाईका लागि मोइन अलीले सर्वाधिक ४७ रन बनाए । उनले ३१ बल खेल्दै ७ चौका र १ छक्का प्रहार गरे ।

ओपनर फाप डु प्लेसिसले अविजित ३६ रन जोडे । पञ्जाबका मोहम्मद शामीले २ विकेट लिए ।

त्यसअघि टस हारेर पहिले ब्याटिङ गरेको पञ्जाबले २० ओभरमा ८ विकेट गुमाएर १०६ रन बनाएको थियो । पञ्जाबका लागि साहरुख खानले सर्वाधिक ४७ रन बनाए । उनले ३६ बल खेल्दै ४ चौका र २ छक्का प्रहार गरे । झ्ये रिचर्डसनले १५ रन जोडे ।

पञ्जाबलाई कम स्कोरमा रोक्न चेन्नाईका दीपक चाहरले ४ ओभरमा १ मेडन राख्दै १३ रन खर्चेर ४ विकेट लिए । साम करन, मोइन अली र ड्वेने ब्राभोले समान १ विकेट लिए ।

हरेक टोलीले समान २ खेल खेलिसक्दा रोयल च्यालेन्जर्स बेङ्लोर दुवै खेल जित्दै अपराजित रहने एक्लो टिम बनेको छ । सनराइजर्स हैदरावाद भने दुवै खेलमा पराजित भएको छ ।