रोयल च्यालेन्जर्स बेङ्लोरले इन्डियन प्रिमियर लिग (आईपीएल)को १४औँ संस्करणमा लगातार दोस्रो जीत हात पारेको छ ।
बुधबार चेन्नइमा भएको खेलमा बेङ्लोरले सनराइजर्स हैदरावादलाई ६ रनले पराजित गरेको हो । बेङ्लोरले दिएको १५० रनको लक्ष्य पछ्याएको हैदरावादले निर्धारित २० ओभरमा ९ विकेट गुमाएर १४३ रन बनाएको थियो ।
हैदरावादका लागि कप्तान डेभिड वार्नरले सर्वाधिक ५४ रन बनाए । यस्तै, मनीष पाण्डेले ३८, रसिद खानले १७ र जोनी बेयर्स्टोवले १२ रन जोडे ।
बेङ्लोरका लागि बलिङमा शहबाज अहेमदले ३ विकेट लिए । त्यसका लागि उनले २ ओभरमा मात्र बलिङ गर्दै जम्मा ७ रन खर्चिए । उनले १७औँ ओभरमा सबै ३ विकेट लिएका थिए । यस्तै, मोहम्मद सिराज र हर्सल पटेलले समान २ विकेट लिए ।
त्यसअघि चेन्नईमा टस हारेर पहिले ब्याटिङ गरेको बेङ्लोरले ग्लेन म्याक्सेवलको अर्धशतकको मद्दतमा २० ओभरमा ८ विकेट गुमाएर १४९ रन बनाएको थियो । म्याक्सवेलले सर्वाधिक ५९ रन बनाए । यस्तै, कप्तान विराट कोहलीले ३३ रन जोडे ।
हैदरावादका ज्यासन होल्डरले ३ र रसिद खानले २ विकेट लिए । यस्तै भुवनेश्वर कुमार, टी नटराजन र शहबाज नदिमले समान १ विकेट लिए ।
लगातार २ खेल जित्दै ४ अंक जोडेको बेङ्लोर अंकतालिकाको शीर्ष स्थानमा छ । लगातार २ खेल हारेको हैदरावाद भने अंकविहीन छ ।