म्यान्मारमा बीबीसीका पत्रकार अपहरणमुक्त, सेनाको कूपछिको हिंसामा २५० बढीको मृत्यु
अपहरणमा परेका म्यानमारका लागि बीबीसीका संवाददाता आङ थुरा अपहरणमुक्त भएका छन् ।
राजधानीस्थित अदालत अगाडि समाचार संकलन कार्य गरिरहेका बेला सादा पोसाकमा आएका व्यक्तिहरूले उनलाई शुक्रबार अपरहण गरेका थिए ।
म्यानमारमा सेनाले गरेको सत्ता कब्जाका विरुद्धमा आन्दोलन चर्किरहेका बेला बेपत्ता भएका पत्रकार आङ थुरा सम्पर्कमा आएको बीबीसीका अधिकारीहरूले सोमबार जनाएका छन् । रिहा भएका पत्रकार र घटनाका बारेमा विस्तृत विवरण भने अहिलेसम्म सार्वजनिक गरिएको छैन ।
बीबीसीका समाचारदातासँगै स्थानीय पत्रकार थान हटिक अउङ पनि बेपत्ता भएका थिए । उनलाई भने अझै पनि अपहरणमुक्त नगरिएको समाचारमा जनाइएको छ ।
यसैबीच गत १ फेब्रुअरीमा भएको सैन्य कूपछिको प्रदर्शनका क्रममा म्यानमारमा अहिलेसम्म २ हजार ६०० जना गिरफ्तार भएका छन् भने २५० भन्दा बढीको मृत्यु भइसकेको समाचार छ । कतिपय अधिकारकर्मीहरूले भने आन्दोलनका क्रममा मारिएकाहरूको सङ्ख्या अझै धेरै हुन सक्ने दाबी पनि गरेका छन् ।
सेनाले नेतृ आङसाङ सु कीसहित धेरै नेताहरूलाई अहिले पनि नियन्त्रणमा लिई राखेको छ । सैन्य विद्रोह भएपछि म्यानमारमा ४० जना पत्रकारहरू पक्राउ परिसकेको अधिकारीहरूले जनाएका छन् । सेनाले ५वटा सञ्चार माध्यमहरूको अनुमति पनि खारेज गरेको जनाइएको छ ।
