पाकिस्तानी प्रधानमन्त्री इमरान खानलाई शनिबार कोभिड- १९ सङ्क्रमण पुष्टि भएको पाकिस्तानी अधिकारीहरूले पुष्टि गरेका छन् ।
पाकिस्तानी सूचनामन्त्री शिब्ली फराजले जियो न्यूज टेलिभिजनसँगको कुराकानीमा प्रधानमन्त्री खानले खोप लगाउनुभन्दा पहिले नै सार्वजनिक कार्यक्रमहरूमा सक्रिय रहेकाले त्यही समय सङ्क्रमण सरेको हुन सक्ने बताएका छन् ।
कोभिड- १९ विरुद्धको पहिलो खोप लगाएको २ दिनपछि उनलाई सङ्क्रमण भएको पुष्टि गरिएको छ । ६८ वर्षीय प्रसिद्ध पूर्व क्रिकेट खेलाडीसमेत रहेका प्रधानमन्त्री खानले बिहीबार चीनमा विकास गरिएको सिनोफार्म खोप लगाएका थिए ।
पाकिस्तानी प्रधानमन्त्रीको कार्यालयले एक विज्ञप्ति जारी गरी भनेको छ, 'अहिले हामी यति मात्र भन्न सक्छौँ कि प्रधानमन्त्री खानलाई सङ्क्रमण पुष्टि भएको छ र उहाँले आफूलाई अन्य व्यक्तिको सम्पर्कबाट टाढा राख्नुभएको छ ।'
प्रधानमन्त्री खानलाई शनिबार हल्का खोकी र ज्वरो आएको पुष्टि उनका प्रवक्ता सहबाज गिलले गर्दै उनको शनिबार नै परीक्षण हुँदा कोभिड- १९ सङ्क्रमण पुष्टि भएको हो ।
प्रधानमन्त्रीलाई सङ्क्रमण पुष्टि भएपछि विगत केही दिनमा उनको निकट पुगेका व्यक्तिहरूलाई सावधानी अपनाउन भनिएको छ ।
पाकिस्तानमा शनिबारसम्ममा ६ लाख २० हजार सङ्क्रमित रहेको सरकारी तथ्याङ्क रहेको छ भने यहाँ कोभिड- १९ सङ्क्रमित १३ हजार ८०० भन्दा बढी व्यक्तिको मृत्यु भइसकेको छ ।
पाकिस्तानले चीनबाट सहयोग स्वरूप प्राप्त १० लाख खोपलाई प्रथमिकताका आधारमा स्वास्थ्यकर्मी तथा अग्रपंक्तिमा खटिने कर्मचारी पत्रकारलगायतका जोखिममा रहेका व्यक्तिहरूलाई दिन सुरु गरिसकेको छ ।
