म्यान्मारमा सुरक्षा बल र प्रदर्शनकारीबीच भइरहेका झडपका क्रममा बीबीसीका एक पत्रकार पनि पक्राउ परेका छन् ।

शुक्रबार राजधानी नेपिदअस्थित एउटा अदालतबाहिर रहेर समाचार संकलन गरिरहेका बेला बीबीसी बर्मेेेली सेवाका पत्रकार आङ थुरालाई सादा पोसाकमा आएका सुरक्षाकर्मीहरूले लिएर गएको बताइएको छ ।

पत्रकार थुरालाई पक्राउ गरिएको प्रति बीबीसीले गम्भीर चिन्ता व्यक्त गर्दै अधिकारीहरूलाई उनको खोजखबरमा सहयोग गर्न आग्रह गरेको छ । 

थुरासँगै स्थानीय समाचार निकाय मिजिमाका पत्रकार थान आङ्लाई पनि पक्राउ गरिएको बताइएको छ । 

एक वक्तव्य जारी गर्दै बीबीसीले म्यान्मारस्थित आफ्ना सबै कर्मचारीको सुरक्षालाई गम्भीरताका साथ लिएको र आङ थुरालाई खोज्न हरसम्भव प्रयास गरिरहेको उल्लेख गरेको छ ।

एउटा नम्बर नखुलेको भ्यानमा आएका मानिसहरूले दिउँसो उनीहरूलाई खोज्दै आएका बताइएको र त्यसपछि थुरासँग सम्पर्क हुन नसकेको बीबीसीले जनाएको छ ।

म्यान्मारमा गत १ फेब्रुअरीमा सेनाले कू गरेयता ४० जना पत्रकारहरू पक्राउ परेकामा १६ जना अझै हिरासतमै रहेका र सेनाले ५ वटा समाचार संस्थाको अनुमतिपत्रसमेत खारेज गरिदिएको बताइएको छ ।

यसैबीच शुक्रबार मात्र सुरक्षा फौजको गोली प्रहारबाट आङ्गबान शहरमा ८ जना मारिएका छन् ।