रुसी राष्ट्रपति भ्लादिमिर पुटिनले अमेरिकी समकक्षी जो बाइडनले आफूलाई 'हत्यारा' भन्दै गरेको टिप्पणीको प्रत्युत्तर दिएका छन् ।
पुटिनले रुसी टेलिभिजनलाई दिएको एक अन्तर्वार्ताका क्रममा बाइडनलाई आफूसँग खुला रूपमा कुरा गर्न चेतावनी दिँदै त्यस्तो जान्नका लागि आफू त्यस्तै हुनुपर्ने बताएका छन् । अमेरिकी राष्ट्रपतिले पुटिनलाई आफूले 'हत्यारा' ठानेको बताएका थिए ।
आफ्ना सुरक्षा निकायहरूले विपक्षी नेता एलेस्की नभाल्नीलाई मार्ने प्रयास गरेको भन्ने आरोपलाई अस्वीकार गर्दै राष्ट्रपति पुटिनले बाल्यावस्थामा खेल मैदानमा बहस गर्दा भन्ने गरेको सम्झिएको र त्यस्तो जान्नका लागि आफू त्यस्तै हुनुपर्नेे बताएका हुन ।
अमेरिकी चुनावी अभियानलाई कमजोर पार्न रुसले प्रयत्न गरेको भन्ने निष्कर्ष निकालेको एउटा अमेरिकी गुप्तचर प्रतिवेदनबारे बाइडनले अमेरिकी टेलिभिजन च्यानल एबीसीको एक अन्तर्वार्तामा पुटिनका सम्बन्धमा त्यस्तो टिप्पणी गरेका थिए ।
मङ्गलबार सार्वजनिक गरिएको १५ पृष्ठ लामो उक्त प्रतिवेदनमा पुटिनले निर्वाचनमा हस्तक्षेपका लागि अनुमति दिएको उल्लेख गर्दै बाइडनलाई बदनाम गर्न र डोनाल्ड ट्रम्पलाई प्रोत्साहन गर्न मतदान प्रणालीप्रति अविश्वास पैदा गराउने एवं अमेरिकामा विभाजनको विचारलाई थप चर्काउन प्रोत्साहित गर्नेजस्ता विधिहरूको उपयोग गरिएको उल्लेख छ ।
बाइडनले उक्त अन्तर्वार्तामा सन् २०२० को अमेरिकी निर्वाचनमा रुसले गरेको हस्तक्षेपको पुटिनले मूल्य चुकाउनुपर्ने बताएका थिए ।
त्यसपछि परामर्शका लागि भन्दै रुसले अमेरिकास्थित आफ्ना राजदूतलाई फिर्ता बोलाएको थियो ।
उक्त रुसी टेलिभिजनमा बोल्दै पुटिनले अमेरिकालाई विभिन्न ठाउँमा नरसंहार गरेको र दोस्रो विश्वयुद्धमा हिरोसिमा र नागासाकीमा आणविक बम खसालेर नागरिकहरूको हत्या गरेको आरोपसमेत लगाएका थिए ।
२ विश्व शक्तिका नाइकेहरूका बीच सुरू भएको यस प्रकारको वाकयुद्धले थप तनाव सिर्जना हुन सक्ने विश्लेषकहरू बताउँछन् ।
