बढ्दो तिक्तता र असमझदारी हटाउन अमेरिकी राष्ट्रपति जो बाइडनको प्रशासनले फेब्रुअरी महिनायता उत्तर कोरियाली सरकारलाई सम्पर्क गर्ने प्रयास गरिरहेका छन् ।

तर, अहिलेसम्म प्योङ्याङबाट कुनै उत्तर प्राप्त हुन सकेको छैन । बढ्दो तनावलाई रोक्न भन्दै वासिङ्टनले प्योङ्याङलाई विभिन्न माध्यमबाट पत्राचारको प्रयास गरेको थियो ।

उत्तर कोरियाको परमाणु कार्यक्रम र विभिन्न क्षेप्यास्त्र कार्यक्रमका कारण २ देशबीच लामो समयदेखि तिक्ततापूर्ण र असहज सम्बन्ध रहँदै आएको छ । बाइडनका पूर्ववर्ती डोनाल्ड ट्रम्प र उत्तर कोरियाली नेता किम जोङ उनबीच ३ पटक वार्ता भए पनि ती वार्ताले उल्लेखनीय प्रतिफल दिन सकेका थिएनन् ।

उत्तर कोरिया आणविक अस्त्र परित्याग गर्न सहमत होस् भन्ने अमेरिका र पश्चिमा मुलुकहरूको प्रमुख चाहना रहेको तर वार्ताका क्रममा सहमति बन्न नसकेपछि ती वार्ताले अपेक्षाकृत सफलता पाउन नसकेका हुन् ।

प्योङ्याङसँग सम्पर्क गर्ने प्रयासअन्तर्गत ‘न्यूयोर्क च्यानल’ भनिने संयुक्त राष्ट्रसङ्घमा रहेको उत्तर कोरियाली नियोगलाई समेत प्रयोग गरिएको थियो । बेलायती समाचार संस्था रोयटर्सका अनुसार उत्तर कोरियासँग ‘कैयौँ पटक’ सम्पर्क गर्न खोजिए पनि १२ महिनाभन्दा बढी समयमा कुनै अर्थपूर्ण सम्पर्क स्थापना हुन सकेको छैन ।

बाइडनले यसअघि नै उत्तर कोरियाका लागि आफ्नो नीतिको समीक्षा गर्ने घोषणा गरेका थिए । त्यस्तो समीक्षा अप्रिल महिनामा सार्वजनिक गरिने अपेक्षा छ विश्व समुदायको । उनले उत्तर कोरियामाथिको चर्को प्रतिबन्ध खुकुलो पार्नुअघि प्योङ्याङको आणविक निरस्त्रीकरण हुनुपर्नेमा जोड दिएका छन् ।