गत महिना सेनाले शासन आफ्नो हातमा लिएपछि त्यसविरुद्ध म्यान्मारमा भइरहेको प्रदर्शनमा जनता मारिने क्रम जारी छ । प्रदर्शनका क्रममा आइतबार एकै दिन कम्तीमा ३८ जना प्रदर्शनकारीको मृत्यु भएको छ ।

आइतबारको प्रदर्शनमा मुख्य शहर यङ्गुनमा कम्तीमा २१ जनाको मृत्यु भएको बीबीसीले उल्लेख गरेको छ ।

सुरक्षा बलले यङ्गुनको हलिङ, थारयार क्षेत्रमा प्रदर्शनकारीमाथि गोली चलाएको थियो । 

चिनियाँ व्यवसायीमाथि हमला भएको भन्दै सेनाले यङ्गुनका केही क्षेत्रमा सैन्य कानुन लागू गरेको छ ।

सेनाले नेत्री आङ सान सु कीलगायतलाई नियन्त्रणमा लिएर शासन आफ्नो हातमा लिएपछि कतिपय सांसदहरू भूमिगत भएका छन् । सेनाले नियन्त्रणमा लिनुअघि नै उम्किन सफल एनएलडीका सांसदहरूले सीआरपीएच नामक एक समिति गठन गरेका थिए । मान विन खाइन थान सीआरपीएचका प्रमुख छन् ।

उनले सेनाले शासनमा नियन्त्रणमा लिएपछि पहिलो पटक सार्वजनिक सम्बोधन गर्दै सेनाविरुद्धको आन्दोलनलाई निरन्तरता दिने बताएका थिए । उनले अहिलेको अवस्था देशका लागि सबैभन्दा अँध्यारो रहेको उल्लेख गर्दै छिट्टै बिहानी आउन लागेको पनि बताएका थिए ।