पक्राउ पर्नबाट उम्किएर भागेका मान विन ख्याङ थानलगायत सैैैैैनिक कदमका विरोधी सांसदहरूले प्रदर्शनकारीहरूलाई सम्बोधन गर्दै क्रान्तिको त्यस घडीमा सुरक्षाकर्मीको दमनबाट आफ्नो रक्षा गर्न आह्वान गरेको केही समयपछि म्यान्मारको मुख्य शहर याङ्गुनमा भएको भिडन्तमा कम्तीमा १४ जना मारिएको बीबीसीले जनाएको छ ।

त्यहाँ दिनभर गोली चलेको आवाज सुनिएको र प्रशस्त सेनाका वाहनहरू देखिएको बताइएको छ ।

याङ्गुनको ल्याङ थारयार नामक स्थानमा रहेका चिनियाँ कारखानाहरू आक्रमणको निशाना बनाइएपछि सैनिक शासक जुन्ताले त्यहाँ 'युद्ध कानुन' (मार्शल ल) लागू गरेका छन् । फलामका रड, बन्चरो र पेट्रोलसहित आएका प्रदर्शनकारीहरूले १० वटा चिनियाँ कारखानामा आगो लगाएर क्षति पुर्‍याएका थिए भने उक्त घटनामा केही चिनियाँ नागरिकहरू घाइतेसमेत भएका थिए ।

यसैबीच एक जना प्रहरी अधिकारी पनि मारिएको त्यहाँको सरकारी टेलिभिजनले जनाएको छ । 

एक स्थानीय अनुगमन समूहलाई उद्धृृत गर्दै अन्तर्राष्ट्रिय समाचार एजेन्सीहरूले जनाएअनुसार सेनाको कूको विरोधमा जारी प्रदर्शनका क्रममा आइतबारसम्ममा कम्तीमा ८० जनाको मृत्यु भइसकेको छ ।

त्यहाँको सेनालाई चीनले मद्धत गरिरहेको भन्दै प्रदर्शनकारीहरू चीनप्रति क्रूद्ध बनेका छन् । 
त्यसैबीच म्यान्मारस्थित चिनियाँ दूतावासले एक विज्ञप्ति जारी गर्दै हिंसाका विरुद्ध कडा कदम चाल्न र त्यहाँ रहेको चिनियाँ जनधनको सुरक्षा गर्न आग्रह गरेको उल्लेख गरिएको छ ।