गत फेब्रुअरी महिनादेखि उत्तर कोरियासँग सम्पर्क गर्न प्रयास गरिरहेको भए तापनि त्यहाँबाट कुनै प्रतिक्रिया प्राप्त भई नसकेको अमेरिकी राष्ट्रपति जो बाइडन प्रशासनले जनाएको छ ।
अधिकारीहरूका अनुसार तनाव रोक्ने उद्देश्यले अमेरिकाले विभिन्न माध्यमबाट प्योङ्याङसँग संपर्क गर्ने प्रयास गरेको थियो ।
अमेरिकाले उत्तर कोरियालाई आणविक हतियार परित्याग गर्न मनाउन गरिएको प्रयास स्वरूप बाइडेनका पूर्ववर्ती डोनाल्ड ट्रम्प र उत्तर कोरियाली नेता किम जोङ उनका बीचमा ३ पटक भएको वार्ता खासै उपलब्धिपूर्ण हुन सकेको थिएन ।
संयुक्त राष्ट्रसंघस्थित उत्तर कोरियाली नियोगलगायत छुट्टाछुट्टै माध्यमबाट विगत १२ महिनाभन्दा लामो समयदेखि उत्तर कोरियासँग संपर्क स्थापित गर्ने प्रयास अर्थपूर्ण हुन नसकेको एक जना अमेरिकी अधिकारीले बताएको बीबीसीले जनाएको छ ।
नेता किमलाई 'ठग'को संज्ञा दिएका राष्ट्रपति बाइडेनले उत्तर कोरियामाथि लगाइएको अमेरिकी र संयुक्त राष्ट्रसंघीय आर्थिक प्रतिबन्ध खुकुलो पार्नुअघि उसले आणविक निशस्त्रीकरण गर्नुपर्ने र आगामी अप्रिलमा उत्तर कोरियासम्बन्धी नीतिको नवीकरण गरिनेसमेत उल्लेख गरेका छन् ।
उत्तर कोरियाले भने अझ सटिक मार हान्न सक्ने लामो दूरीको क्षेप्यास्त्र, ठूला वारहेडहरू, गुप्तचरी गर्ने उपग्रहहरू र आणविक ऊर्जायुक्त पनडुब्बीहरू विकसित गरिसकेको दावी गर्दै आफ्नो देशको सैन्य क्षमता वृद्धि गर्ने कुरालाई जोड दिँदै आइरहेको छ ।
उत्तर कोरियाले सन् २०१७ मा अमेरिकाका शहरहरूसम्म मार हान्न सक्ने लामो दूरीको क्षेप्यास्त्रको परीक्षण गरेपछि ती २ देशबीचको सम्बन्धमा अझ ठूलो दरार आएको थियो । तत्कालीन राष्ट्रपति ट्रम्पले किमसँग सुमधुर सम्बन्ध विकास गर्ने प्रतिबद्धतापछि ३ पटक सम्पन्न भएका द्विपक्षीय वार्ताहरू दुवै पक्षले आआफ्नो अडान नछाडेपछि बिनानिष्कर्ष टुङ्गिएका थिए ।
आंशिक रूपमा आफ्ना हतियार नष्ट गर्ने र बदलामा आर्थिक प्रतिबन्ध हटाइनुपर्ने उत्तर कोरियाको मागलाई अमेरिकाले अस्वीकार गरेको थियो ।
आफ्नो सबैभन्दा हितैसी मुलुक चीनसँगको व्यापारसमेत क्रमिक रूपमा घट्दै गइरहेको उत्तर कोरिया कोभिड- १९ महामारीसँगै पछिल्लो १ वर्षदेखि बाहिरी विश्वबाट पूरै अलग्गिएको बताइएको छ ।
