१ फेब्रुअरीमा कू गरि सेनाले सत्ता कब्जा गरेपछि त्यसको बिरोधमा भएको शान्तिपूर्ण प्रदर्सनमाथि सुरक्षाबलको दमन रोकिएको छैन । यसै क्रममा शनिबार मात्र ६ जना प्रदर्शनकारीहरू मारिएको रोयटर्सले जनाएको छ ।

म्यन्मारको दोस्रो ठूलो शहर मान्डलेमा ३ र अन्यत्र ३ गरी जम्मा ६ जना मारिएसँगै प्रजातान्त्रिक सरकार बर्खास्त गरी सेनाले सत्ता हत्याए यता त्यहाँ ज्यान गुमाउनेको संख्या ७० पुगेको बताइएको छ । 

नेतृ आङ सान सु किलाई अज्ञात स्थलमा बन्धक बनाई राखिएको र अन्य हजारौं नेता तथा प्रदर्शनकारीलाई गिरफ्तार गरिएको छ ।

सु किलाई ६ लाख गैरकानुनी ढंगले अमेरिकी डलर र ठूलो मात्रामा सुन लिएको पछिल्लो गम्भीर अभियोगसमेत अन्य केही सामान्य आरोप लगाइएको छ । 

बेलायत, अमेरिका, क्यानाडा, संयुक्त राष्ट्रसंघ, युरोपेली संघलगायतले सैनिक शासकमाथि निर्वाचित सरकारको पुनर्वहाली गर्न र पक्राउ परेकालाई बिना सर्त रिहा गर्न दबाब दिदै विभिन्न प्रतिबन्धहरू घोषणा गरिसकेका छन् । 

निहत्था प्रदर्शनकारीमाथि सुरक्षाकर्मीले घातक हतियार प्रयोग गर्ने गरेको एम्नेस्टी इन्टरनेसनललगायत मानवअधिकारवादी संस्थाहरूले जनाएका छन् ।