म्यान्मारको सैनिक शासकले अपदस्त गरिएकी नेतृ आङ सान सु कीलाई गैरकानुनी ढंगले ६ लाख डलर र सुन लिएको आरोप लगाएको छ ।

गत १ फेब्रुअरीमा सेनाले प्रजातान्त्रिक सरकारको नेतृत्वलाई अपदस्त गरेपछि सु कीविरुद्ध लगाइएको यो सबैभन्दा ठूलो आरोप हो । 

उक्त आरोप पुष्टि गर्ने कुनै प्रमाण भने उपलब्ध नगराइएको बताइएको छ ।

गत ५ हप्तादेखि अज्ञात स्थानमा बन्धक बनाइएकी सु कीलाई उक्त आरोपका अतिरिक्त कोभिड- १९ को प्रतिबन्धको उल्लंघन गरेको, गैरकानुनी रूपमा रेडियो उपकरणहरू प्रशोधन गरेको र त्रास फैलाएको लगायत अभियोग लगाइएको छ ।

सेनाको कूपछि लगातार भइरहेको शान्तिपूर्ण  प्रदर्शनमा सेनाले नृशंस दमन गर्दै आएको छ । आइतबार मात्र कम्तीमा ६ जना प्रदर्शनकारीहरू मारिएको र कतिपयको टाउकोमा गोली प्रहार गरिएको प्रत्यक्षदर्शीलाई उदृत गर्दै बीबीसीले जनाएको छ ।

म्यायिङ शहरको बीच भागमा मारिएका ती ६ जनासमेत सैन्य कूपश्चात् मारिनेको संख्या ६० पुगेको जनाइएको छ ।

संयुक्त राष्ट्रसंघ, अमेरिकालगायत विश्व समुदायले सेनाको हिंसात्मक कदमको भर्त्सना गर्दै तत्काल दमन रोक्न आग्रह गर्दै आएको भए तापनि सेनाले नटेरेको बताइएको छ ।