सूचना र प्रविधिको विकाससँगै आजको समयमा विश्वभरका घटना, दुर्घटनाबारे घरमै बसीबसी जानकारी लिन सकिने भएको छ । आमचासोका विषयलाई एक क्लिकको भरमा संसारभर फैलाउन सकिने भएको छ । यो आधुनिक विज्ञान र प्रविधिको महत्त्वपूर्ण र अर्थपूर्ण देनलाई धन्यवाद दिनै पर्छ । प्रविधिको विकाससँगै मानव जीवन सहज भएको छ तथापि प्रविधिको गलत प्रयोगले उत्पन्न गराउने हानि/नोक्सानीको जोखिम पनि सँगसँगै छ । यसर्थ विवेकको उच्चतम प्रयोगद्वारा भएका प्रविधिको उपयोग गरी सूचना समाजलाई व्यवस्थित, मर्यादित र फलदायी बनाउने जिम्मेवारी हामीमा छ ।
अहिलेको समाज (मानिस) सूचनाविहीन भएर बस्न सक्दैन । हातहातमा भएका प्रविधिले मानिसलाई सूचना-निरपेक्ष रहन दिँदैन । त्यसमाथि मिडिया र सामाजिक संजालका कारण मानिस अब चाहेर पनि सूचना समाजभन्दा पर रहन संभव छैन । अहिले एउटै ठाउँमा सबै रूपका मिडिया प्रयोग गर्न सकिने भएकाले पनि सूचनाका लागि मानिस निकै समृद्ध बनेको छ । पछिल्लो समय इन्टरनेटको आगमनसँगै खुलेका अनलाइनहरूले निमेषभरमा सूचना विस्तार गरेका छन् । यो प्रविधिमा आएको फड्कोलाई विश्वभरका मानिसले व्यापक उपयोग गरेका छन् ।
विश्वमा भएका घटना, दुर्घटना, राजनीतिक/कूटनीतिक/वातावरणीय/वैज्ञानिक/आर्थिकलगायतका गतिविधिबारे आमजनलाई सुसूचित गर्ने हेतु हामीले पनि अनेकौँ अनलाइनका माझमा खबरपातोडटकम (www.khabarpato.com) तपाईं सामु ल्याएका छौँ । हामीले भनेका छौँ- 'निष्पक्ष समाचार, तटस्थ विचार ।' कुनै पनि घटना वा विषयबारेका समाचारमा हाम्रो पक्षधरता शून्य बराबर हुनेछ । हामी कसैको पक्षपोषण वा विरोधमा हाम्रो ऊर्जा, श्रम र समय खर्चिनेछैनौँ । आममानिसको तथ्य सूचना पाउने हकलाई सम्मान गर्नेछौँ ।
यसरी नै हामी कुनै घटना वा विषयका सवालमा तटस्थ विचार राख्नेछौँ । सन्तुलित विचारको प्रवाह गर्ने हाम्रो नीति हुनेछ । तर, राष्ट्र, राष्ट्रियता, राष्ट्रिय स्वाभिमान, राष्ट्रिय सुरक्षा, लोकतन्त्र, मानवअधिकार, शान्ति र स्थिरताका सवालमा हामी निष्पक्ष र तटस्थ रहन सक्दैनौँ, यो हाम्रो घोषित नीति हुनेछ । हामी दैनन्दिनका सबै सूचनाको पछि लाग्नेछैनौँ तर गम्भीर सूचनालाई आमजनमा प्रेषित गर्न चुक्नेछैनौँ । हाम्रो मूल ध्येय समाजका हरविषयमा बहस र छलफल चलाउनु हुनेछ । राजनीतिदेखि सामाजिक, आर्थिक, सांस्कृतिक, शैक्षिक, साहित्यिक आदि सबै विषयमा गम्भीर र तथ्यपरक छलफल र बहस हाम्रो मूल लक्ष्य हुनेछ ।
हामी हाम्रा शुभेच्छुक पाठक, विज्ञापनदाता, सूचनादाताहरूप्रति आभारी छौँ । रचनात्मक सुझाव, सल्लाह र सहयोगको अपेक्षा हरदम रहनेछ ।