अन्तर्राष्ट्रिय महिला दिवसको अवसरमा स्वीजर्ल्याण्डको जुरिकमा महिलावादी सहभागी एक जुलुसमा प्रहरीले अश्रुग्यास प्रहार गरेको र दुई जना प्रदर्शनकारीलाई गिरफ्तार गरिएको बताइएको छ । 

एजेन्सीहरुका अनुसार कोविड-१९ का कारण स्वीजरल्याण्डमा सामूहिक कार्यक्रम गर्नमा रोक लगाइएको हुनाले संगठितरूपमा गर्न लागिएको उक्त प्रदर्शन शुरू हुनु अगावै प्रहरीले चेतावनी दिएको थियो ।

त्यहाँको प्रदर्शनमा १०० भन्दा कम मानिसहरूको सहभागिता रहेको प्रहरीले जनाएको छ ।

शहरका विभिन्न भागहरू बाट भेला भएका प्रदर्शनकारीहरूलाई रोक्न अश्रुग्यास प्रहार गर्नु परेको र एक प्रदर्शनकारीले एकजना प्रहरीलाई टोकेकोसमेत स्थानीय प्रहरीलाई उदृत गर्दै अन्तर्राष्ट्रिय संचारमाध्यमहरूले जनाएका छन् ।  

प्रहरीलाई टोक्ने ती महिलालाई गिरफ्तार गरिएको र अरू प्रदर्शनकारीहरूले उनलाई छुटाउन खोज्दा अर्को एक जनालाई पक्राउ गरी फेरि अश्रुग्यास प्रहार गर्नु परेको समाचारमा उल्लेख गरिएको छ ।