३ वटा किसानसम्बन्धी कानुनको विरोधमा उत्रिएका भारतीय किसानको आन्दोलनका कारण सिन्धु, टिक्रीलगायत दिल्लीका अधिकांश सीमानाका बन्द गरिएका छन् । 

चिल्ला नाका यातायातका लागि पूरै खोलिएको छ भने घजिपुर नाका दिल्लीबाट घजिपुरका लागि मात्र खोलिएको बताइएको छ । 

चिल्ला नाका केही हप्ता किसानहरूले बन्द गरेपछि जनवरीको अन्त्यतिर मात्र खोलिएको थियो ।

दिल्ली प्रवेश गर्ने अधिकांश नाकाहरू बन्द भएका कारण बाहिरबाट आउने सवारी चालकहरूलाई ट्राफिक प्रहरीले वैकल्पिक मार्गको प्रयोग गर्न सुझाउने गरेको छ ।

सिन्धु, टिक्री, औचदी, साबोली र मनियारीलगायत दिल्ली र हरियाणाबीचका प्रवेश र निकास मार्गहरूमा बन्द जारी छ ।किसान आन्दोलनका कारण दिल्लीको सीमानाका बन्द हुँदा यातायातका साधन र यात्रुहरूले सास्ती भोग्नुपरेको जनाइएको छ ।

घजिपुर, टिक्री र सिन्धुको सिमानामा गत सालको नोभेम्बर महिनादेखि किसानहरूले लगातार प्रदर्शन गर्दै आएका छन् ।