म्यान्मारमा सुरक्षाकर्मी र प्रदर्शनकारीबीच भएको पछिल्लो झडपमा कम्तीमा १० जना मारिएका छन् ।
देशभरका अन्य शहरहरूबाट थप हताहतीका समाचार आइरहेका भए पनि पुष्टि भएको छैन ।
सुरक्षा बलले मन्डले र मोनिवामा ठूलो भीडमा अन्धाधुन्ध गोली चलाएको थियो, जसमा धेरै पीडितमध्ये २ जना नाबालक पनि भएको बताइएको छ ।
म्यान्मारमा १ फेब्रुअरीमा सेनाले सत्ता कब्जा गरेपछि त्यसको विरोधमा निरन्तर जनप्रदर्शन भइरहेका छन् ।
उक्त कूपश्चात् जननिर्वाचित सरकारलाई अपदस्त गरी आङ सान सु कीलगायत नेताहरूलाई बन्दी बनाइएको थियो । प्रदर्शनकारीहरूले नेताहरूको रिहाइ र सैनिक शासनको अन्त्यको माग गरिरहेका छन् ।
सेनाले आङ सान सु कीको पार्टीले भारी बहुमत ल्याउन सफल गत नोभेम्बरको आमनिर्वाचनमा व्यापक धाँधली गरिएको हुनाले सत्ता हातमा लिनुपरेको दाबी गर्दै आएको भए तापनि उक्त आरोप सिद्ध गर्ने कुनै प्रमाण प्रस्तुत गर्न सकेको छैन ।
हालसम्मको १ महिना लामो अस्थिरताका दौरान त्यहाँ कम्तीमा २८ जना मानिसहरू मारिएका छन् ।
संयुक्त राष्ट्रसंघलगायत अन्तर्राष्ट्रिय समुदायबाट भइरहेको हिंसाको भर्त्सना र शान्तिको अपिललाई बेवास्ता गर्दै सेनाले शान्तिपूर्ण प्रदर्शनकारीमाथि निर्मम दमन गरिरहेको समाचार आइरहेका छन् ।
एजेन्सीहरूका अनुसार प्रत्यक्षदर्शीहरूले केही शहरहरूमा चेतावनी नै नदिईकन सुरक्षा बलले प्रदर्शनकारीमाथि गोली चलाएको उल्लेख गरेका छन् ।
