भारतले एक उपग्रहमा भारतीय प्रधानमन्त्री नरेन्द्र मोदीको एउटा तस्वीर र एक थान भागवत गीताको पुस्तक अन्तरिक्षमा पठाएको छ ।

प्रधानमन्त्री मोदीको उक्त फोटो चेन्नईस्थित स्पेस किड्ज इन्डिया (एसकेआई)का विद्यार्थीहरूद्वारा तयार गरिएकाे सतिश धवन स्याट (एसडिस्याट) नामक अन्तरिक्ष यानको माथिल्लो प्यानेलमा कुँदिएको छ । 

पृथ्वीको अवलोकन गर्न ब्राजिलको अमेजोनिया १ लगायत अन्य १८ वटा उपग्रहरूसँगै  सतिश धवन-स्याट नामक उपग्रह आइतबार सतिश धवन अन्तरिक्ष केन्द्रबाट प्रक्षेपण गरिएको थियो ।

एसकेआईका अनुसार उक्त यानमा मोदीको तस्वीरका अलावा अन्य २५ हजार नामहरू पनि पठाइएको छ । प्रम मोदीले इस्रोलाई बधाई दिँदै यसले देशलाई अन्तरिक्ष अभियानको नयाँ युगमा प्रवेश गर्न संकेत गरेको बताए ।भारतीय उद्योगले विकसित गरेको अन्तरिक्ष यान पठाउने यो पहिलो मिसन बन्यो ।

अमेजोनिया १ पूर्ण रूपमा ब्राजिलले विकसित गरेको पृथ्वीको अवलोकनका लागि पठाइएकाे पहिलो उपग्रह हो ।