एजेन्सीहरूका अनुसार सेनाले गरेको सत्ता कब्जाका विरुद्ध प्रदर्शन चर्काउन खोज्ने प्रदर्शनकारीमाझ म्यान्मारको सुरक्षा बलले अन्धाधुन्ध गोली चलाउँदा आइतबार मात्र १८ जना मारिएका छन् भने ३० जनाभन्दा बढी घाइतेे भएका छन् ।
यो गत फेब्रुअरी १ मा सेनाले कू गरेपछिको आङ सान सु कीको निर्वाचित सरकारको पुनःस्थापनाको माग गर्दै भइरहेको प्रदर्शनका क्रममा एकै दिनमा भएको सर्वाधिक हताहतीको घटना हो । आइतबार मात्र १ हजारभन्ददा बढी प्रदर्शनकारीलाई गिरफ्तार गरिएको छ ।
संयुक्त राष्ट्रसंघीय मानवअघिकारको कार्यालयलाई उदृत गर्दै हिन्दुस्तान टाइम्सले जनाएअनुसार याङ्गुुन, दवेइ, मन्डलेइ, मेइक, बागो र पोकोक्कु भन्ने ठाउँहरूमा प्रदर्शनकारीको भीडमा अन्धधुन्ध गोली चलाउनुका साथै अश्रुग्यास र ग्रिनेडसमेत प्रहार गरिएको थियो ।
प्रदर्शनको समाचार संकलन गर्ने शिलशिलामा शनिबार बिहान एसोसिएटेड प्रेसका एकजना पत्रकारलाई नियन्त्रणमा लिइएको थियो । एपीले उनलाई तत्काल रिहा गर्न माग गरेको छ ।
त्यहाँको भयावह अवस्था र आधिकारिक स्रोतबाट समाचार प्राप्त हुन नसकेका कारण विशेष गरी याङ्गुुन, मन्डलेइ र नेइपितअभन्दा बाहिरका स्थानहरूमा भएका घटनामा मृत्यु भएका प्रदर्शनकारीहरूको संख्याको यकिन गर्न कठिन छ ।
संयुक्त राष्ट्रसंघका महासचिव एन्टोनियो गुटेरेसले शान्तिपूर्ण प्रदर्शनकारीमाथि भएको दमनको भर्त्सना गर्दै जथाभावी गिरफ्तार गर्ने कार्यप्रति गम्भीर ध्यानाकर्षण भएको जनाएका छन् । साथै उनले सेनालाई मतदानमार्फत व्यक्त गरिएको जनमतको सम्मान गर्न र दमन रोक्नका लागि दबाब दिन अन्तर्राष्ट्रिय समुदायलाई एक हुन अपिलसमेत गरेका छन् ।
अमेरिकी विदेशमन्त्री एन्टाेनी ब्लिङ्केनले पनि उक्त हिंसात्मक घटनाको भर्त्सना गरेका छन् ।
