पाकिस्तानी प्रधानमन्त्री शहबाज सरिफले आफ्ना भारतीय समकक्षी नरेन्द्र मोदीसँग २ देशबीचका बाँकी मुद्दाहरूको शान्तिपूर्ण समाधानमा जोड दिएका छन् । सरिफले एउटा पत्र लेखेर मोदीलाई यस्तो आग्रह गरेका हुन् ।
यसअघि मोदीले पाकिस्तानको प्रधानमन्त्रीमा निर्वाचित भएकामा शहबाज सरिफलाई बधाई दिँदै पठाएको पत्रको जबाफमा सरिफले पनि पत्र पठाएका हुन् ।
पत्रमा सरिफले अर्थपूर्ण भारत–पाकिस्तान सम्बन्धबाट २ देशका जनता र क्षेत्रको सामाजिक–आर्थिक विकास हासिल गर्न सकिने बताएका छन् ।
अर्थपूर्ण सम्बन्धबाट नै जम्मु र काश्मिरसहित सबै बाँकी विवादहरूको शान्तिपूर्ण समाधान हुने प्रधानमन्त्री सरिफले आशा गरेका छन् ।
सरिफले पाकिस्तान र भारतबीचको ‘शान्तिपूर्ण र सहयोगी’ सम्बन्ध २ देश र क्षेत्रका जनताको सामाजिक–आर्थिक विकासका लागि आवश्यक रहेको बताए ।
सार्थक वार्ता र जम्मु तथा काश्मिरको मूल मुद्दासहित सबै बाँकी विवादहरूको शान्तिपूर्ण समाधानमा सरिफले जोड दिएका छन् ।
त्यस्तै, केही दिनअघि सरिफलाई पठाएको पत्रमा मोदीले भारतले पाकिस्तानसँग रचनात्मक सम्बन्ध चाहेको बताएका थिए । सरिफले आफू क्षेत्रीय शान्ति र सुरक्षाका लागि प्रतिबद्ध रहेको पनि बताएका थिए ।
इमरान खानमाथि संसद्मा पेस भएको अविश्वासको प्रस्ताव संसद्बाट पारित भएपछि ११ अप्रिलमा शहबाज सरिफ नयाँ प्रधानमन्त्रीमा निर्वाचित भएका थिए ।
