रुसले युक्रेनमा सर्वसाधारणहरूलाई निशाना बनाएको युक्रेन सरकारले बताएको छ । रुसले अस्पताल, नर्सरी र विद्यालयमा हमला गरेको युक्रेनका उपप्रधानमन्त्रीले बताएका छन् ।
युक्रेनी सेनाको कठोर प्रतिकारपछि रुसी सेनाले सर्वसाधारणमाथि ठूलो सैन्य कारबाही गरेको उपप्रधानमन्त्री ओलहा स्टेफानिसाइनाले बताए ।
आइतबार मात्र रुसी सेनाको गोलाबारीमा परेर इरपिनमा एकै परिवारका ४ जना मारिएका थिए । उनीहरू युद्धग्रस्त इरपिनबाट सुरक्षित क्षेत्रतर्फ भाग्ने क्रममा मारिएका थिए ।
त्यस्तै, मारिओपोल शहरमा सामूहिक उद्धार कार्य स्थगित भएको छ । मारिओपोल शहरमा पाँचौँ दिन पनि पानीको हाहाकार देखिएको छ । त्यहाँ ऊर्जा, खानेकुरा र पानी अभाव देखिएको बताइएको छ ।
रुसको शृंखलाबद्ध गोलाबारीका कारण सर्वसाधारणलाई सुरक्षित क्षेत्रतर्फ सार्ने योजना स्थगित भएको जनाइएको छ । तर, रुसले यसको दोष युक्रेनी फौजलाई लगाएको छ ।
विश्व स्वास्थ्य संगठनले स्वास्थ्य केन्द्रहरूमाथि हमला भइरहेका बताएको छ । रुसी सेनाले घना बस्ती भएको स्थानमा निशाना बनाएको बेलायत सरकारले आरोप लगाएको छ ।
आइतबार राष्ट्रसंघका अनुगमनकर्ताहरूका अनुसार रुसी सेनाले २४ फेब्रुअरीमा युक्रेनमा हमला गरेपछि ३६४ जनाको मृत्यु भएको पुष्टि गरेका छन् । तर, वास्तविक तथ्यांक सोभन्दा बढी भएको हुन सक्ने अनुमान गरिएको छ । राष्ट्रसंघीय मानवअधिकार आयोग यूएनएचसीआरका अनुसार रुसी सेनाले हमला गरेपछि मात्र १५ लाख युक्रेनीले देश छाडेका छन् ।
तर, रुसले सर्वसाधारणलाई निशाना नबनाइएको बताउँदै आएको छ । आफ्नो विशेष सैन्य कारबाही युक्रेनी राष्ट्रवादी र नवनाजीविरुद्ध भएको रुसी तर्क छ ।