मोदी र जेलेन्स्कीबीच टेलिफोन वार्ता हुँदै
प्रधानमन्त्री नरेन्द्र मोदीले युक्रेनका राष्ट्रपति भोलोदिमिर जेलेन्स्कीसँग टेलिफोन वार्ता गर्ने भएका छन् । युक्रेन संकटबारे राष्ट्रपति जेलेन्स्कीसँग मोदीले छलफल गर्ने भएका हुन् ।
युक्रेनमा रुसले हमला गरेपछि पछिल्लो पटक प्रधानमन्त्री मोदीले २६ फेब्रुअरीमा जेलेन्स्कीसँग वार्ता गरेका थिए । सो वार्तापछि रुसी हमलाबारे राष्ट्रसंघको सुरक्षा परिषदमा भएको निन्दा प्रस्तावमा भारत तटस्थ बसेको थियो ।
युद्धग्रस्त युक्रेनमा फसेका आफ्ना सयौँ विद्यार्थीलाई भारतले उद्धार गर्ने प्रयास गरिरहेका बेला सोमबार २ नेताबीच वार्ता हुन लागेको हो ।
युक्रेनी शहर सुमीमा रहेको मेडिकल कलेजको होस्टेलमा फसेका विद्यार्थीहरूलाई हिजो भारतीय दूतावासले ‘छोटो सूचनामा छाड्न’ भनेको थियो । विद्यार्थीहरूलाई सुरक्षित ढंगले उद्धारको संयोजन गर्न पोल्ताभामा अधिकारीहरूको समूह तैनाथ गरिएको छ ।
युद्धग्रस्त क्षेत्रबाट विद्यार्थीहरूको उद्धार अधिकारीहरूका लागि चुनौतीपूर्ण मानिएको छ । चिसोका कारण उद्धारमा कठिनाइ भएको बताइएको छ । केही विद्यार्थीले जोखिम मोलेर रुसी सीमामा पुग्ने निर्णय गरेको भिडियो शेयर गरेका छन् । तर, सरकारले उनीहरूलाई अनावश्यक जोखिम नमोल्न सुझाएको छ ।
आफ्ना ७०० विद्यार्थीलाई युद्ध प्रभावित क्षेत्रबाट खाली गर्नका लागि उत्तरपूर्वी युक्रेनी शहरमा युद्धबिराम गर्न भारतले युक्रेन र रुसलाई अनुरोध गरेको छ । फेब्रुअरीको अन्त्यतिर रुसी सेनले युक्रेनमा अतिक्रमण गरेपछि उनीहरू त्यहाँ फसेका थिए ।
