युक्रेन तनाव: १४ बालबालिकासहित ३५२ को मृत्यु
युक्रेनले यही १२ फागुनदेखि सुरु गरेको रुसी हमलामा १४ बालबालिकासहित ३५२ सर्वसाधारण मारिएको दाबी गरेको छ । रुसी तोपले युक्रेनको दोस्रो ठूलो शहर खार्किभका अधिकांश आवासीय क्षेत्रमा हमला गरेको छ । खार्किभमा रुसी सेनाको गोलाबारीमा परेर कम्तीमा ११ सर्वसाधारणको मृत्यु भएको छ ।
रुसले क्षति सामना गरेको पहिलो पटक स्वीकारेको बताइएको छ । रुसी हमलापछि ५ लाखभन्दा बढी मानिस युक्रेन छाडेर छिमेकी मुलुकमा शरण लिइरहेको राष्ट्रसंघको शरणार्थीसम्बन्धी निकायले जनाएको छ । पछिल्लो स्याटलाइट तस्बीरमा युक्रेनको राजधानी किभबाट उत्तरतर्फ रुसी सेना बोकेका कन्भोयका ताँती गुडेको देखिन्छन् ।
के भन्छन् पुटिन ?
रुसी राष्ट्रपति भ्लादिमिर पुटिनले युक्रेन तटस्थ, डिनाजिफाइड (नाजी सोचबाट मुक्त) र निशस्त्र भए मात्र युक्रेन समस्या समाधान सम्भव हुने बताएका छन् । फ्रान्सका राष्ट्रपति इमानुएल म्याक्रोँसँगकाे टेलिफोन वार्तामा राष्ट्रपति पुटिनले रुसले सन् २०१४ मा बिलय गराएको क्रिमियालाई औपचारिक रूपमा मान्यता दिनुपर्ने माग गरेका छन् ।
यसैबीच युक्रेन र रुसी वार्ताकार थप छलफलका लागि आआफ्ना देशका राजधानी शहरमा फर्किएका छन् । पुनः वार्ताका लागि उनीहरू सम्बन्धित सरकारसँग छलफलमा जुटिरहेका छन् ।