आज ३१ अक्टोबर । आज विश्व इतिहासमा विभिन्न सामाजिक तथा राजनीतिक घटनाक्रम विकसित भएका थिए । प्रस्तुत छ आज भएका केही महत्त्वपूर्ण विश्व घटनाः 

७ अर्ब जनसंख्याको विश्व
सन् २०११ को १ नोभेम्बरमा विश्वको कूल जनसंख्या ७ अर्ब पुगेको थियो । राष्ट्रसंघको जनसंख्या कोषले सन् २०११ को १ नोभेम्बरलाई ७ अर्बको जनसंख्या भएको दिनको रूपमा स्मरण गर्छ । 

इजिप्टको विमान दुर्घटना
सन् १९९९ मा आजकै दिन इजिप्ट एयरको फ्लाइट ९९० दुर्घटनामा परेको थियो । अमेरिकाको पूर्वी तटमा भएको सो दुर्घटनामा विमानमा सवार सबै २१७ जनाको मृत्यु भएको थियो । 

क्याथोलिक चर्चको पश्चात्ताप
सन् १९९२ मा क्याथोलिक चर्चका तत्कालीन धर्म गुरु पोप जोन पल द्वितीयले क्याथोलिक चर्चले गल्ती गरेको भन्दै पश्चात्ताप व्यक्त गरेका थिए । १७औँ शताब्दीमा ग्यालिलियो ग्यालिलीलाई चर्चले गरेको व्यवहार खेदजनक भएको जोन पलले स्वीकारेका थिए । 

इन्दिरा गान्धीको हत्या
सन् १९८४ का भारतकी प्रथम महिला प्रधानमन्त्री इन्दिरा गान्धीको हत्या भएको थियो । गान्धीको हत्या आफ्नै अंगरक्षकले गरेका थिए । उनको हत्यापछि राजधानी नयाँ दिल्लीलगायत भारतका विभिन्न स्थानमा भड्किएको हिंसामा हजारौँ शिख मारिएका थिए ।

एकीकृत अगाडिको दक्षिण यमन 
सन् १९७८ मा जनगणतन्त्र यमनले आफ्नो संविधान लागू गरेको थियो । सन् १९९० मा दक्षिण यमन उत्तर यमनसँग एकीकृत भई अहिलेको यमन बनेको हो ।