अफगानिस्तानका तालिबानले विभिन्न स्थानमा कब्जा जमाउन थालेका छन् । पछिल्ला केही सातायता अफगानिस्तानका तालिबानले विभिन्न स्थानमा विजय हासिल गरेको भन्दै यहाँका सरकारी कार्यालय तथा विभिन्न प्रान्त कब्जा गरिरहेको बताएका हुन् ।
उनीहरूका अनुसार हालसम्म अफगानिस्तानका तालिबानले ६ वटा प्रान्तीय राजधानीमा कब्जा जमाउन सफल भइसकेको विभिन्न समाचारमा जनाइएको छ । उनीहरूले कब्जा गरेकामध्ये कुन्दुज पनि एक हो । यो प्रान्त कब्जा गरेको घटनालाई तालिबानले निकै महत्त्वपूर्ण रहेको भनेका छन् ।
अफगानिस्तानमा पछिल्लो समयमा बिग्रँदो अवस्थाबीच युद्धबिरामका लागि पनि केही अन्तर्राष्ट्रिय अपिल भएकामा त्यसलाई तालिबान विद्रोहीले अस्वीकार गरेको छ । तालिबानले पछिल्लो समय अफगानिस्तानमा एकपछि अर्को मुख्य शहर कब्जा जमाइरहेकाले पनि यस अपिललाई अब आवश्यक नरहेको प्रतिक्रिया दिएका छन् ।
पछिल्ला दिनमा तालिबानले अफगानिस्तानमा हमलाका घटना बढाएका छन् । यसबीच अमेरिकी र अफगान विमानले विद्रोहीमाथि कयौँ हवाई हमला गरेका छन् । अफगान अधिकारीले यी हमलामा कैयौँ मानिसको ज्यान गएको बताएका छन् ।
तालिबानले अमेरिकालाई अफगानिस्तानमा थप कारबाही नगर्न चेतावनी दिएका छन् । उत्तरी अफगानिस्तानका ३ वटा शहरमा मात्र केही घण्टाको अन्तरमा तालिबानले कब्जा जमाएको खबर बाहिर आएपछि अमेरिकी सेनाले हवाई हमला गरेको थियो । कुन्दुजको स्थिति निकै अशान्त रहेको बताइएको छ । सामाजिक संजालमा तालिबान लडाकु कुन्दुज र सर-ए-पुलको सरकारी भवनमा प्रवेश गरेको बताइएको छ ।
यता, अफगान सरकारी सुरक्षा बलले भने अझै पनि कुन्दुजमा तालिबानसँग संघर्ष गरिरहेको पाइएको छ । तालिबानका अधिकारीले उनीहरूले बागलान प्रान्तको राजधानी पुल-ए-खुमरीलाई निशाना बनाउने तयारी गरेको जानकारी दिएका छन् ।
