इरानमा नयाँ राष्ट्रपतिका रुपमा इब्राहिम रइसी निर्वाचित भएका छन् । रइसीलाई आइतबार इरानको नयाँ राष्ट्रपतिय चुनावको विजेता घोषणा गरिएको थियो।
कट्टरपन्थी नेता रइसी इराकको राष्ट्रपति पदमा निर्वाचित भएपछि इजरायललगायत अन्तर्राष्ट्रिय समुदायले गम्भीर चासो देखाएका छन् ।
इजरायली विदेश मन्त्रालयका एक प्रवक्ता लिओर हैअतलाई उदृत गर्दै बिबिसीले जनाएअनुसार इरानमा इब्राहिम रइसीलाई नयाँ राष्ट्रपतिमा निर्वाचित भएको चुनावलाई अन्तर्राष्ट्रिय समुदायले गम्भीर चासो दिनुपर्ने बताएको छ । ती प्रवक्ताले नयाँ राष्ट्रपतिले इरानको आणविक गतिविधिहरू बढाउने भन्दै सजग गराएका छन् ।
इरानका सर्वोच्च नेतापछि राष्ट्रपति दोस्रो वरीयतामा रहन्छन् । राज्यसम्बन्धी सम्पूर्ण मामिलामा अन्तिम निर्णय सर्वोच्च नेता आयातोल्लाह अलि खामेनेईको हुने भए तापनि राष्ट्रपतिको आन्तरिक र वैदेशिक मामिलामा महत्त्वपूर्ण प्रभाव हुन्छ ।
रइसीले अगस्ट महिनाबाट पदभार सम्हाल्नेछन् । आलोचकहरुले इरानको चुनावको ढाँचा रइसीले जित्ने गरी बनाइएको आरोप लगाएका छन् ।
हाल इरानका प्रधानन्यायाधीश रहेका रइसी अतिरूढिवादी विचार राख्ने व्यक्तिमा गनिन्छन् ।
प्रवक्ता हैयतले ट्वीट गर्दै रइसीसँग सन् १९८८ मा हजारौँ राजनीतिक बन्दीहरूलाई मारिएको सन्दर्भ जोडेर उनलाई 'तेहरानको निर्दयी हत्यारा' भनेका छन् ।
'मृत्युदण्डसम्बन्धी समिति'का चारमध्ये एक न्यायाधीश रइसीले पाँच हजार पुरुष तथा महिलालाई मृत्युदण्ड दिएको एमनेस्टी इन्टर्नेशनलको भनाइ छ ।
रुसी राष्ट्रपति भ्लादिमिर पुटिनलगायत सिरिया, इराक, टर्की र यूएईका नेताहरूले रइसीलाई बधाई दिँदै आफूहरूबीचको परम्परागत रूपमा रहेको मैत्रिपूर्ण पारस्परिक सम्बन्धलाई स्मरण गरेका छन् ।
मानव अधिकारवादी समूहहरूले भने रइसीमाथि अमानवीय अत्याचारको कसीमा अनुसन्धान हुनुपर्ने बताएका छन् ।
इरानले सामूहिक मृत्युदण्ड दिइएको आरोप स्वीकार गरेको छैन । रइसीले पनि उनीमाथि लागेको आरोपबारे सफाइ दिई नसकेको अन्तर्राष्ट्रिय संचारमाध्यमले जनाएका छन् ।
