अमेरिकाले २ वर्षभित्र करिब १०० वटा देशलाई ५० करोड फाइजर खोपको मात्रा उपलब्ध गराउने जनाएको छ । अमेरिकी राष्ट्रपति जो बाइडनको प्रशासनले उक्त मात्रामा खोप उपलब्ध गराउने अमेरिकाका संचार माध्यमहरूले जनाएका छन् ।

गरिब देशहरूमा कोरोना भाइरसविरुद्धको खोपको दर वृद्धिका लागि सघाउन अमेरिकामाथि दबाब परिरहेका बेला उक्त निर्णय सार्वजनिक भएको हो । स्रोतका अनुसार यस वर्षभित्र २० करोड खोपको मात्रा वितरण गरिनेछ भने बाँकी सन् २०२२ मा वितरण गरिनेछ ।

अन्तर्राष्ट्रिय समाचार संस्था रोयटर्सका अनुसार अमेरिकी सरकारले ९२ वटा कम आय भएका देश र अफ्रिकी सङ्घलाई उक्त खोप सहयोग गर्नेछ ।

सो खोप कोभ्याक्स कार्यक्रममार्फत वितरण गरिने जनाएको छ । गत वर्ष स्थापित कोभ्याक्सले धनी र गरिब देशहरूबीच खोपको पहुँचमा विभेद नहोस् भन्ने आवाज उठाउँदै आएको छ ।

यसअघि अमेरिकाले कोभ्याक्समार्फत मात्र ६ करोड मात्रा खोप उपलब्ध गराउने घोषणा गरेको भए तापनि अमेरिकी राष्ट्रपतिका रूपमा पहिलो विदेश भ्रमणको सुरुवात गर्दै बाइडन यूकेमा ओर्लिएपछि खोपसम्बन्धी पछिल्ला खबरहरू सार्वजनिक भएका हुन् ।

यद्यपि, ह्वाइट हाउसले भने ५० करोड खोपको वितरणका सम्बन्धमा आधिकारिक रूपमा केही नबताएको अन्तर्राष्ट्रिय समाचार संस्थाहरूले जनाएका छन् ।