इजरायल र प्यालेस्टाइनबीचको संघर्ष केही दिन यता अझ हिंसात्मक हुँदै गएको छ । इजरायलका प्रधानमन्त्री बेन्जामिन नेतन्याहुले द्वन्द चर्किएको सातौं दिन पुग्दै गर्दा रकेट आक्रमणप्रति कडा प्रतिक्रिया दिइने चेतावनी दिएका छन् ।
गत सोमवार लडाइ शुरू भए यता गाजामा कम्तीमा १४८ जना मानिसहरूको मृत्यु भइसकेको जनाइएको छ । इजरायलमा दुई बच्चा सहित १० जना मारिएको बताइएको छ ।
पछिल्लो पटक आइतवार बिहान गाजामा इजरायली हवाई आक्रमणमा परी कम्तीमा ३ प्यालेस्टिनीहरूको ज्यान गएको समाचार छ ।
एजेन्सीहरूका अनुसार प्यालेस्टिनी विद्रोहीहरूले तेल अभिभतिर रकेट प्रहार गरेपछि उनीहरू बमबाट बच्ने क्षेत्रतिर लागेका थिए।
अन्तर्राष्ट्रिय समुदायले त्यहाँ चर्कँदो द्वन्द्व अन्त्य गर्न आग्रह गरेको छ । यसैक्रममा शनिवार अमेरिकी राष्ट्रपति जो बाइडनले नेतान्याहू र प्यालेस्टिनी राष्ट्रपति मोहम्मद अब्बासलाई टेलिफोन गर्दै चिन्ता व्यक्त गरेका थिए । संयुक्त राष्ट्र सङ्घीय सुरक्षा परिषद्को बैठक शनिवारका लागि तय गरिएको छ ।
इजरायलले गाजामा मृत्यु भएकामध्ये दर्जनौँ लडाकुहरू रहेको बताएको छ भने प्यालेस्टिनी स्वास्थ्य अधिकारीहरूले मृतकमध्ये ४१ जना बालबालिका रहेको उल्लेख गरेका छन् ।
प्रधानमन्त्री नेतान्याहूले टेलिभिजनमार्फत बोल्दै 'आवश्यक परेसम्म' कारबाही जारी रहने भन्दै त्यसमा आफ्ना नागरिकहरू नपरुन् भनेर हर सम्भव प्रयास जारी रहेको बताए छन् ।
नेतान्याहूले आक्रमणको दोषी आफूहरू नभएको दाबी गर्दै आफूहरूमाथि आक्रमण गर्नेहरूलाई दोषी भएको जिकिर गरेका छन् ।
विगत ६ दिन देखि पूर्वी जेरुसलेममा इजरायली र प्यालिस्टिनीबीच तनाव बढ्दै गएपछि हिंसा चर्किएको छ ।
यसअधि गाजा क्षेत्रमा नियन्त्रण जमाएको प्यालिस्टिनी विद्रोही समूह हमासले त्यहाँबाट इजरायली फौज हटाउन चेतावनी दिँदै आक्रमण गरेपछि इजरायलले प्रत्याक्रमण गरेको अन्तर्राष्ट्रिय संचारमाध्यमहरूले जनाएका छन् ।