नियमित अभ्यासका क्रममा ५३ जना चालक दलका सदस्यसँगै बेपत्ता भएको नौसैनिक पनडुब्बीको इन्डोनेसियाली युद्धपोतहरूले बिहीबार बिहानैदेखि खोजी कार्यलाई तीब्र बनाएका छन् ।
इन्डोनेसियाको समुद्री क्षेत्रमा बेपत्ता भएको उक्त पनडुब्बीको खोजीका लागि अन्य मुलुकका युद्धपोत पनि खटिएका छन् ।
बुधबार बिहानीपख समुद्रमा डुबेको आशंका गरिएको उक्त जहाजबाट चुहिएको तेल समुद्रको सतहमा देखिएको थियो । प्रारम्भिक अनुसन्धानमा उक्त पनडुब्बी समुद्रको निकै गहिराइमा डुबेको अनुमान गरिएको छ ।
रक्षा विश्लेषकहरूका अनुसार केआरआई नाग्गाला ४०२ नम्बरको पनडुब्बीमा धेरै दिनसम्म पुग्ने गरी अक्सिजन रहेको भए पनि जहाज समुद्रको करिब ७०० मिटर गहिराइमा पुगेर टुक्राटुक्रा हुन सक्नेछ ।
अस्ट्रेलियाका रक्षामन्त्री पिटर डटनले प्रारम्भिक रिपोर्टले 'भयानक त्रासदी'को सम्भावना देखिएको बताए ।
जर्मन निर्मित पनडुब्बी नौसैनिक जहाजहरूको अभ्यासकै क्रममा दुर्घटनामा परेको थियो । डुबुल्की लगाएको केही समयभित्रै जहाजसँगको संचार सम्पर्क बिच्छेद भएको थियो ।
नौसेनाका प्रवक्ता जुलियस विजोजोनोले तेल चुहिएको क्षेत्रलाई केन्द्रित गरी खोजी कार्य तीब्र बनाइएको जानकारी दिए । तर, कुन ठाउँमा डुबेको हो भन्ने ठ्याक्कै खुट्याउन नसकिएको उनको भनाइ छ ।
सेनाले पनडुब्बीको खोजीका लागि ६ वटा युद्धपोत र हेलिकोप्टर पठाइसकेको छ ।
संयुक्त राज्य अमेरिका, अस्ट्रेलिया, फ्रान्स र जर्मनीसमेतका अन्य मुलुकले पनि सहयोगका लागि प्रस्ताव गरेका छन् । अस्ट्रेलियाका विदेशमन्त्री मारिज पेनले यो घटना इन्डोनेसियाली जलसेनाका लागि निकै दुःखद स्थिति रहेको बताए ।
छिमेकी मुलुकहरू सिंगापुर र मलेसियाले पनडुब्बीको खोजी कार्यका लागि जहाजहरू त्यसतर्फ पठाइसकेका छन् । इन्डोनेसियाली सेनाले युद्धपोतमा बढी तौल भए/नभएको बारेमा भने कुनै प्रतिक्रिया दिएको छैन ।
करिब १ हजार ३०० टनको केआरआई नाग्गाला ४०२ पनडुब्बी सन् १९८१ मा निर्माण भएको हो । इन्डोनेसियाले पछिल्ला वर्षहरूमा आफ्ना युद्धपोतलाई अद्यावधिक र आधुनिक बनाउने प्रक्रिया थालेको छ । इन्डोनेसियासँग हाल जर्मनी र दक्षिण कोरियामा निर्मित ५ वटा पनडुब्बी छन् ।
