कोरोना भाइरसको महामारीबाट १ वर्षदेखि सङ्कट बेहोरिरहेको संयुक्त राज्य अमेरिकामा लाखौँ अमेरिकी बेरोजगार बनेका छन् । अर्थतन्त्र पुनः खुला भए पनि कतिपय रोजगारदातामाथि नयाँ मानिसलाई रोजगारी दिनेतर्फ अनपेक्षित चुनौती देखिएको छ ।
कोरोना भाइरसबाट संक्रमित हुने डरदेखि बालबच्चाको हेरचाहबापत प्राप्त हुने सरकारी बेरोजगार भत्ताको लोभमा कतिपय बेरोजगार अमेरिकीहरू काममा पुनः फर्कन चाहिरहेका छैनन् ।
'यो कोभिड सङ्कटका लागि विरोधाभास हो', अक्सफोर्डका प्रमुख अमेरिकी अर्थशास्त्री ग्रेगरी डाकोले भने, 'हामीसँग नयाँ रोजगारी र मागका बीचमा असन्तुलन छ र आउँदा महिनाहरूमा जोखिम बढ्नेछ ।'
कोरोनाका खोपले व्यवसायलाई सामान्यतर्फ उन्मुख गराइरहेकाले अमेरिकी अर्थ व्यवस्थामा सुधार आउन थालेको छ भने कम्पनीहरूले पनि बढ्दो माग पूरा गर्न भर्ती गर्न थालेका छन् ।
विश्लेषकहरूको भनाइमा सबै बेरोजगार व्यक्तिहरू आफ्नो जागिरमा फिर्ता हुन तयार देखिएका छैनन् ।
'मुख्य मुद्दा नै हामीबीच अझै पनि महामारी छ र कामको खोजी गर्नेहरूमा कार्यस्थलको स्वास्थ्य र सुरक्षाका बारेमा ठूलो चिन्ता छ', जिपरिक्रुटरकी अर्थशास्त्री जुलिया पोलकले भनिन् ।
अमेरिकी जनसंख्याका एक चौथाइले पूर्ण खोप लगाइसकेका छन् । यो संख्या युरोपको भन्दा बढी छ भने धेरै प्रमुख अर्थतन्त्र भएका मुलुकभन्दा निकै बढी छ । यसको बाबजुद देशको ३ चौथाइ भाग कोरोनाको सङ्क्रमण हुने जोखिममा छ ।
जर्जटाउन विश्वविद्यालयको फ्युचरएडका अनुसार कोरोना महामारीका कारण बन्द भएका देशभरका आधाभन्दा बढी विद्यालयहरू पूर्णकालिक कक्षामा फर्किसकेकाले बच्चाको हेरचाहको काम गर्ने अभिभावकहरूका लागि यो अर्को चुनौती हो ।
विश्वकै सबैभन्दा ठूलो अर्थ व्यवस्था भएको संयुक्त राज्य अमेरिकामा कोरोनाको महामारीले झण्डै २२ करोड रोजगारी समाप्त पारिदिएको थियो, जसमध्ये आधाभन्दा बढी अर्थात् १ करोड ४० लाख रोजगारी पुन:स्थापना भइसकेको छ ।
तैपनि, स्वरोजगारमा रहेका समेत झण्डै १ करोड ७० लाख मानिसले अझै पनि सरकारी बेरोजगारी सहायता प्राप्त गरिरहेका छन् र धेरैले आंशिक समय काम गरिरहेका छन् किनभने उनीहरू पूर्ण समय काम गर्न पाउँदैनन् ।
तर, अर्थशास्त्री डाकोले मजदुरको अभाव धेरै क्षेत्रमा देखिएको बताए । खुला, खाद्य सेवा, आतिथ्य र मनोरञ्जन जस्ता कामदार कटौती भएका क्षेत्रमा श्रमजीवीको माग बढेको उनको भनाइ छ ।
गत फेब्रुअरीको आखिरी र अप्रिलको सुरुको बीचको अवधिमा गरिएको अमेरिकी व्यवसायको सर्वेक्षणमा केन्द्रीय बैंकले भनेको छ, 'कर्मचारी भर्तीमा चुनौती व्यापक देखिएको छ, खासगरी यो समस्या न्यून ज्याला वा घण्टे कामदारका लागि बढी देखिएको छ ।'
भर्जिनियाको रिचमन्डमा केन्द्रीय बैंकले गरेको सर्वेक्षणमा सहभागी एक होटल व्यवसायीले आफूहरूले फ्रन्ट डेस्कका कामदार भर्ती गर्न सकेको तर सरसफाइका मजदुर भेट्टाउन नसकेको प्रतिक्रिया दिएका छन् । उनले सरसफाइमा काम गर्न धेरैले अरुचि देखाएको बताए ।
बैंकको सिकागो शाखाले गरेको सर्वेक्षणमा बेरोजगार मजदुरलाई घरमै राख्ने थुप्रै कारकहरू रहेको जनाएको छ, जसमा सरकारले उपलब्ध गराउने वित्तीय सहयोग पनि एउटा प्रमुख रहेको छ । जस्तै : आगामी अगस्टसम्म उनीहरूले सरकारबाट साप्ताहिक थप ३०० डलर बेरोजगार भत्ता पाउनेछन् ।
सिकागो शाखाले मानिसहरू रोजगारीमा फर्कन कठिनाइ हुनुमा बालबच्चाको स्याहार अर्को समस्या रहेको जनाएको छ । भाइरसको चिन्ता, सार्वजनिक यातायात प्राप्त गर्न कठिनाइ र जागिर खोज्ने थकान जस्ता प्रक्रियाले पनि जटिलता थपेको छ ।
अमेजन, कस्टको, टार्गेट र वाल्मार्ट जस्ता कतिपय ठूला कम्पनीले कर्मचारीको तलब वृद्धि गर्ने घोषणा गरेका छन् ।