अफगानिस्तानको कान्दाहार प्रान्तमा बिहीबार राती भएको एक बम बिस्फोटमा परी कम्तीमा ४ जनाको मृत्यु भएको छ ।

मारिएका ती सर्वसाधारणमा ३ जना एकै परिवारका रहेका बताइएको छ । १ महिला र उनकै २ बच्चाको मृत्यु भएको समाचारमा जनाइएको छ । 

शाह वाली कोट जिल्लाको जर्ताली इलाकामा ती परिवारको गाडी बमसँग ठोक्किँदा उनीहरुको सवारी साधन ध्वस्त भएको प्रहरीले बताएको छ ।
अफगानिस्तानमा विद्रोहीहरूले सुरक्षा बललाई लक्षित गर्दै गृहनिर्मित बम सडक किनारमा बिस्फोट गराउँदै आएका छन् । यस्ता घातक हतियारहरूले सर्वसाधारणलाई पनि बारम्बार हानि पुर्‍याउँदै आएका छन् ।
अफगानिस्तानमा सन् २०२० मा जारी सशस्त्र द्वन्द्वमा परी २ हजार ९५० भन्दा बढी सर्वसाधारणको मृत्यु हुनुका साथै ५ हजार ५४० भन्दा बढी घाइते भएका देशको स्वतन्त्र मानवअधिकार आयोगले जनाएको छ । 

सन् २०२० मा भएका अरू छुट्टै घटनाहरूमा ३३० जना महिला र ५६५ बालबालिकाको मृत्यु भएको आयोगले जानकारी दिएको छ ।