अमेरिकी अन्तरिक्ष एजेन्सी नासाले एक महिना अगाडि मंंगल ग्रहको सतहमा पर्सिभिअरन्स नामक यान अवतरण गराएको थियो । उक्त यानमा पठाइएको १.८ किलो वजनको इन्ज्युनिटी नाम दिइएको एउटा सानो हेलिकोप्टरलाई आगामी अप्रिलको सुरुमा मंगल ग्रहमा उडाउने नासाले जनाएको छ ।

दुईवटा रोटर भएको उक्त हेलिकोप्टरले हावाको चाप धेरै कम भएको मंंगलको आकाशमा उड्ने प्रयास गर्नेछ । यदि त्यो मिसन सफल भए त्यो ओर्भिल र विल्भर राइट दाजुभाइले सन् १९०३ मा पहिलो पटक पृथ्वीमा वजनदार विमान उडाउँदा जस्तो प्रसन्नता प्राप्त हुने नासाले बताएको छ ।

हाल पर्सिभिअरन्सको पेटभित्रै रहेको उक्त हेलिकोप्टरलाई अबको केही दिनमा जमिनमा राखिने छ ।

उक्त हेलिकप्टरका लागि इन्जिनियरहरूले १० मिटर लम्बाइ र उत्तिकै चौडाइको क्षेत्र रोजेका छन्। त्यहाँ सो हेलिकप्टरले पाँच वटा छोटो दूरीको उडान भर्ने  प्रयास गर्ने छ र पर्सिभिअरन्स यानले ती उडानहरूलाई क्यामरामा उतार्ने प्रयास गर्ने छ।

प्रतिमिनेट २,४०० पटक घुम्ने दुई रोटरमा राखिएका कार्बनले बनेका चार वटा पङ्खायुक्त त्यो हेलिलप्टरको पहिलो उडान सतहभन्दा तीन मिटर माथिसम्म उठ्ने,  घुम्ने र ३० सेकेन्ड अडिने खालको सामान्य हुनेछ ।

पृथ्वी बाहेकको अर्को ग्रहमा गर्न लागिएको यस परीक्षण उडानका लागि बैज्ञानिकहरू होसियारीपूर्वक प्रतीक्षा गरिरहेको नासाले जनाएको छ ।