अहिले विश्वका विभिन्न विकसित तथा शक्तिशाली देशहरू प्रविधिमा नयाँनयाँ कुराको खोजीमा छन् । इन्टरनेटमा फाइभ जी इन्टरनेट सुरु भइसकेको छ । त्यसभन्दा नयाँ पुस्ताको वायरलेस नेटवर्क अर्थात् सिक्स जी नेटवर्कमा अहिले विश्व केन्द्रित भएको छ ।
फाइभ जी इन्टरनेट स्वयंमा तीव्र गतिको इन्टरनेट हो । यसको स्पिड फोर जीको तुलनामा २० प्रतिशत बढी हुन्छ । तर, सिक्स जी इन्टरनेट यी सबै पुरानाभन्दा बढी स्पिडको हुनेछ ।
सिक्स जी वायरलेस इन्टरनेटबाट स्पिड, लेटेन्सी, स्पेक्ट्रम, आर्टिफिसियल इन्टेलिजेन्स, साइबर सेक्युरिटी तथा ऊर्जा दक्षता जस्ता क्षेत्रहरू अझै अत्याधुनिक हुने विश्वास गरिएको छ ।
तेस्रो विश्वका धेरै देशहरू भने अहिले पनि फाइभ जी नेटवर्ककै पहुँचमा छैनन् । चीनले भने सिक्स जी इन्टरनेटको सुरुआत गर्न काम गरिरहेको बताएको छ ।
चीनले अल्ट्राफास्ट वायरलेस इन्टरनेटको रूपमा रहेको सिक्स जीको परीक्षण पनि गरिरहेको छ । सिक्स जी इन्टरनेटको डाउनलोड स्पिड १०० जीबीपीएस हुने बताइएको छ अर्थात् यो फाइभ जीको तुलनामा धेरै गुणा तेज हुनेछ ।
अमेरिका आफू चीनभन्दा पछि पर्ने कुराले चिन्तित छ । गत शुक्रबार ह्वाइट हाउसले आगामी पुस्ताको वायरलेस इन्टरनेटका विषयमा चर्चा गर्नका लागि यस उद्योगका नेतृत्वहरूसँग छलफल गरेको थियो । अन्य देशहरू सिक्स जी कनेक्टिभिटीको मापदण्डमा अगाडि हुने डर अमेरिकालाई छ । खासमा अमेरिकाको चिन्ता चीनप्रति लक्षित छ ।
चाइना एरोस्पेस साइन्स एन्ड इन्डस्ट्रीको दोस्रो एकेडेमीका २५ वटा संस्थाहरूले पहिलो पटक टेराहर्ज आवृत्ति तहमा सफलतापूर्वक वायरलेस सञ्चार गरेको जनाएका छन् । उक्त परीक्षणबाट १०० गिगाबाइट प्रतिसेकेन्डको गति प्राप्त भएको थियो अर्थात् यो अमेरिकाको १ गिगाबाइट प्रतिसेकेन्ड चल्ने फाइभ जी नेटवर्कभन्दा सय गुणा तेज छ ।