अमेरिकी अन्तरिक्ष अध्ययन संस्था नेसनल एरोनोटिक्स एण्ड स्पेस एडमिनिस्ट्रेसन (नासा)ले हालसम्मको सबैभन्दा शक्तिशाली रकेट एसएलएसको सफल परीक्षण गरेको बताएको छ ।
सम्पूर्ण मिसनको महत्त्वपूर्ण हिस्सा एसएलएसलाई जमिनबाट अन्तरिक्षसम्म पुर्याउन लाग्ने ८ मिनेटको समय भएको र उक्त ८ मिनेटको समयसम्म यसका इन्जिनहरू सफलतापूूर्वक चलिरहेका बताइएको छ ।
यसअघि गत तजनवरीमा एसएलएसको ठूलो हिस्साका लागि गरिएको पहिलो परीक्षणमा इन्जिन चाँडै बन्द भएको थियो ।
सन् १९७२ यता पहिलो पटक चन्द्रमामा मानिस लैजानका लागि एसएलएसको निर्माण गरिएको नासाले बताएको छ ।
ट्रम्प प्रशासनले सुरु गरेको नासाको आर्टिमिस परियोजनाअन्तर्गत रहेको यो मिसनमा रकेटको भित्री भागमा ४ वटा आरएस- २५ इन्जिन र छेउमा २ वटा बुस्टर समाहित गरिएका छन् ।
बिहीबार परीक्षण सुरु गर्दा धुवाँको मुस्लो उठ्नुका साथै जमिनमा कम्पन भएको जनाइएको छ ।
यो महान् दिन र महान् परीक्षण समर्पण र मिहिनेतले प्राप्त भएको उल्लेख गर्दै वैज्ञानिकहरूले बिहीबारको उक्त परीक्षणले अमेरिकी अन्तरीक्ष यात्रीहरूलाई मंगलको अन्वेषण गर्ने तयारीका लागि चन्द्रमामा फर्किने सन्दर्भमा एक कदम अगाडि ल्याएको जनाएका छन् ।
सन् १९६० को दशकमा एपोलो अन्तरिक्ष यात्रीलाई चन्द्रमामा पुर्याएको विशाल स्याटर्न भी रकेटमा प्रयोग भएको इन्जिनलाई परीक्षण गर्न त्यही स्ट्यान्डको प्रयोग गरिएको थियो ।
बिहीबारको परीक्षणअघि इन्जिनियरहरूले रकेटको ट्याङ्कीमा ७ लाख ग्यालेन (२६ लाख लिटर) इन्धन भरेका थिए, जसमा रकेटको इन्धनको रूपमा हाइड्रोजन र इन्धनलाई प्रज्ज्वलित गराउने तरल अक्सिजन समावेस थिए ।
आर्टेमिस- १ नाम दिइएको उक्त मिसनअन्तर्गत ओरिअन नामक एउटा नयाँ पुस्ताको यात्रुवाहक यानलाई परीक्षणका लागि चन्द्रमाको परिक्रमा गर्न पठाइने नासाले जनाएको छ ।