पञ्चांग निर्णायक समितिले जनाएअनुसार आज खण्डग्रास सूर्य ग्रहण लाग्दै छ । नेपाली समयअनुसार दिउँसो १ बजेर ५७ मिनेटदेखि साँझ ६ बजेर ५६ मिनेटसम्म लाग्ने यो सूर्य ग्रहण नेपालबाट नदेखिने जनाइएको छ ।

सुदूरपूर्वी एवं उत्तर अमेरिका, मंगोलिया, चीन, नर्वे, ग्रिनल्याण्ड, यूके, युरोप र प्यासिफिक क्षेत्रबाट देखिने सूर्य ग्रहणको नेपालमा भने कुनै असर नहुने पञ्चांग निर्णायक समितिले जनाएको छ ।

ग्रहणको समयमा सूर्यको वरिपरि कुण्डलाकार आकृति देखिनेछ, जुन आकृतिलाई 'रिङ अफ फायर' पनि भन्ने गरिन्छ । सूर्य, चन्द्रमा र पृथ्वी सिधा रेखामा आउँदा कुण्डलाकार सूर्य ग्रहण लाग्छ । सामान्यतया, यो खगोलीय घटना सूर्य र पृथ्वीको बीचमा चन्द्रमा आएको कारणले हुन्छ र केही समयका लागि कुनै खास क्षेत्रमा अन्धकार हुन्छ ।

पञ्चांग समिति स्रोतले नेपालबाट नदेखिने यो सूर्य ग्रहण बार्न आवश्यक नरहेको जनाएको छ ।