शनिबार मंगल र पृथ्वीका बीचमा चन्द्रमा आउने छ । आकाशको अवलोकनमा रूचि भएकाहरूका लागि  यो खुशीको खबर हो ।

आज साँझ चन्द्रमाको ठीक पछाडिपट्टी एउटा रातो थोप्लोका रूपमा मंगल ग्रह देखापर्नेछ । जब चन्द्रमा पृथ्वी र मंगलको ठिक सिधा रेखामा पुग्नेछ, त्यसबेला मंगल ग्रह केहीबेरका लागि देखिने छैन । 

अमेरिकी अन्तरीक्ष संस्था (नासा) का अनुसार कुनै दुई ठूला वस्तुहरूका बीचबाट कुनै सानो वस्तु गुज्रिंँदा यस्तो प्रकारको संयोग बन्दछ जसलाई अंग्रेजीमा 'ओकल्टेसन' भनिन्छ । 

मंगल र पृथ्वीका बीचबाट प्रत्येक बर्ष २ पटक चन्द्रको गमन हुने भए तापनि स्थान र समयको तालमेल मिलाउन सके मात्र त्यस्तो दृश्य पृथ्वीबाट देख्न सकिने खगोलवीदहरूले बताएका छन् ।

नासाले भारत, अफ्रिका र इन्डोनेसियाको पस्चिमी तटलगायतका ठाउँहरूबाट उक्त दृश्यको अवलोकन गर्न सकिने जनाएको छ ।

खगोलीय गतिविधिहरूको अनुगमन गर्ने संस्थाहरूले उत्सुक मानिसहरूलाई साँझ ५:०० बजे देखि सूर्यास्तपछिको ९० मिनटसम्म चन्द्रमा तिर हेर्न सुझाव दिएका छन् । चन्द्र-मंगलको यो संयोग करिब ३० मिनेटसम्म कायम रहने बताइएको छ । आज काठमाडौमा चन्द्रमा राति ११:११ बजे अस्ताउनेछ भने मंगल राति  ११:०३ बजे अस्ताउनेछ ।