संक्रमण बढे पुन लकडाउन हुनसक्छ : स्वास्थ्य मन्त्रालय
स्वास्थ्य तथा जनसंख्या मन्त्रालयका सहप्रवक्ता डा.समीरकुमार अधिकारीलेले कोरोना संक्रमितको संख्या उच्च हुनगएमा संक्रमणको चक्र रोक्नका लागि लकडाउन गर्नुपर्ने अवस्था आउनसक्ने बताएका छन् ।
बुधबार मन्त्रालयद्वारा आयोजित नियमित मिडिया ब्रिफिङका क्रममा सहप्रवक्ता डा. अधिकारीले मानिसहरुले अनावश्यक भिडभाड बढाउनु, मास्क नलगाउनु, सामाजिक दुरी कायम नगर्नु, भेटघाट तथा गोष्ठी बढ्नुले संक्रमितको संख्या बढ्दै गएको बताए ।
लडकाउन गर्नु नेपाल सरकारको उद्देश्य नभएको जनाउदै सहप्रवक्ता डा. अधिकारीले सरकारले परिस्थित अनुसार नीतिगत निर्णय गरेर संक्रमणको चक्र रोक्नुपर्ने र संक्रमणलाई भयावह रुपमा फैलिन नदिन सजग हुनुपर्ने आवश्यकता रहेको उल्लेख गरे ।
नजिकिदै गरेको होली पर्व घरमै बसेर मनाउन र अनावश्यक भिडभाड नगर्न आग्रह गरेका डा. अधिकारीले पछिल्लो समय भारतमा कोरोना संक्रमितको संख्या बढेसँगै नेपाल फर्किनेको संख्यामा वृद्धि हुँदै गएको जानकारी गराए ।
यसअघि स्वास्थ्य मन्त्रालयले नाकामा आवश्यक सुरक्षा अपनाउनका लागि हेल्थ डेस्कलाई सक्रिय रुपमा सञ्चालन गर्न र नेपाल प्रवेश गर्ने व्यक्तिलाई मास्क उपलब्ध गराउन निर्देशन दिइसकेको छ ।