चितवनको भरतपुर महानगरपालिका- २९ मा भार्लाङ सिँचाइ योजना निर्माण सम्पन्न भएको छ । महानगरपालिकाको ७१ लाख रुपैयाँको लागतमा निर्माण भएको योजनाको सोमबार महानगर प्रमुख रेनु दाहालले उद्घाटन गरिन् ।
महानगरपालिकाका प्रमुख दाहालले सिँचाइ सुविधा पुगेपछि गाउँ हराभरा भएको बताइन् । उनले महानगरपालिकाले सिँचाइलाई प्राथमिकतामा राख्दै काम गर्दैआएको बताइन् । ‘कृषि क्षेत्रलाई प्राथमिकतामा राखेका छौँ । सबै क्षेत्रमा सिँचाई सुविधा पुर्याउन महानगरपालिका लागिपरेको छ’, प्रमुख दाहालले भनिन् ।
महानगरपालिकाले भूमिगत सिँचाइलाई पनि प्राथमिकता दिइरहेको छ । ५ वर्षको अवधिमा विभिन्न अयोजनामार्फत समन्वय गरेर ७ हजार बिघा क्षेत्रफलमा सिँचाइको व्यवस्था गरिएको प्रमुख दाहालले बताइन् ।
उक्त आयोजनाका इन्जिनियर विजयराज न्यौपानेले सिँचाइ योजनामार्फत जुगेडी, लामा गाउँ, सिमलडाँडा, नेवार गाउँ, चेपाङ टोलदेखि चौतारासम्मका नागरिक लाभान्वित भएको जानकारी दिए । मुख्य पाइप लाइन विस्तारमा ४३ लाख, ट्याङ्की निर्माणमा २० लाख र शाखा पाइपलाइन विस्तारमा ८ लाख रुपैयाँ खर्च भएको छ । आयोजनाको काम २०७८ सालदेखि सुरु भएको हो ।
भार्लाङका चित्रबहादुर गुरुङ सिँचाइ सुविधा पुगेपछि व्यावसायिक रुपमा कृषि कर्म थालिएको बताउँछन् । उनी आफैँले पनि व्यावसायिक रूपमा तरकारी खेती गर्न थालेका छन् । विगतमा जेततेन २ कठ्ठामा मात्र धान रोप्दै आएका गुरुङले अहिले ९ कठ्ठामा रोपेका छन् ।
'सिँचाइको अभाव थियो । यहाँ कोदो, मकै, गहत, मास मात्र उब्जनी हुन्थ्यो’, ट्याङ्की निर्माण गर्न जग्गासमेत दिएका गुरुङले हराभरा भएको खेत देखाउँदै भने, 'अहिले मकै भाँचेर धान रोपेको छु । धान काटेपछि तरकारी खेती गर्ने योजना छ ।'
सिँचाइ कुलो नहुँदा हिँउदे खेती लगाउन नपाएर पुरै जमिन बाँझो राख्नुपर्ने बाध्यताको अन्त्य भएको स्थानीय भार्लाङ टोल विकास संस्थाका अध्यक्ष मिलन श्रेष्ठ बताउँछन् । ‘मकै, कोदो लगाउँथ्यौँ । तरकारी र धान रोप्न पानी नहुने', उनले भने, 'यस वर्ष ८ कठ्ठामा धानसमेत रोपेको छु । अहिलेसम्म राम्रो देखिएको छ ।’ उनले तरकारी खेतीको समेत विस्तार गर्ने योजना रहेको सुनाए ।
भरतपुर महानगरपालिकाको सहयोगमा करिब ३ किलोमिटर दुरीमा रहेको भार्लाङ खोलाबाट वस्तीमा सिँचाइका लागि पानी ल्याइएको छ । खोलाको पानी ट्याङ्कीमा संकलन हुन्छ । ट्याङ्कीको क्षमता डेढ लाख लिटरको छ । त्यहाँबाट पाइमार्फत किसानको खेतखेतमा पानी पुर्याइएको उनले बताए । भरतपुर- २९ का वडा सदस्य डिलकुमार श्रेष्ठले कोदो र मकै मात्र हुने गाउँमा सिचाइँको सुविधापछि धान र बाह्रै मास तरकारी फल्ने गरेको बताए । उनले हरेक महिना गाउँघर हरियाली भएको भन्दै सबै स्थानिय व्यावासायिक रूपमा तरकारी खेतीमा लागेको जानकारी दिए ।
भरतपुर- २९ का वडाध्यक्ष सूर्यबहादुर गुरुङले भैगोलिक रूपमा विकट रहेको वडालाई कृषि र पर्यटनमार्फत संमृद्ध बनाइने बताए । उनले आवश्यकताका आधारमा वडाका अन्य क्षेत्रमा पनि सिचाइँ सुविधा पुर्याउने प्रतिबद्धता जनाए ।
