स्वास्थ्य मापदण्ड पालना नगर्नेलाई कारबाही गर्ने : काठमाडौ जिल्ला प्रशासन
सार्वजनिक स्थलमा हिँड्डुल गर्दा मास्क प्रयोग नगर्ने र स्वास्थ्यका मापदण्ड पालना नगर्नेलाई जिल्ला प्रशासन कार्यालय काठमाडौंले कारबाही गर्ने चेतावनी दिएको छ ।
बुधबार एक विज्ञप्ति निकाल्दै प्रशासन कार्यालयले कोभिड-१९को संक्रमण जोखिम उच्च रहेको र संक्रमणको दर बढ्दै गएकाले सार्वजनिक स्थानमा आवत जावत गर्दा मास्क अनिवार्य प्रयोग गर्न र स्वास्थ्यका मापदण्ड पालना गर्न आग्रह हो । उक्त विज्ञप्तिमा सार्वजनिक स्थानमा आवतजावत गर्दा मास्क प्रयोग नगर्ने र स्वास्थ्य मापदण्ड पूरा नगर्ने व्यक्तिलाई संक्रामक रोग ऐन, २०२० बमोजिम कारबाहीसमेत हुने व्यहोरा सर्वसाधारणको जानकारीको लागि सूचित गरिन्छ भनिएको छ ।
भारतसँगको सीमानाकाहरुबाट आउने मानिसहरु दैनिक रुपमा काठमाडौं उपत्यकामा आवतजावत गर्ने क्रम बढेको जनाउदै कोभिड-१९ को संक्रमण दर बढ्दै गएकाले त्यसको प्रभाव उपत्यकामा समेत बढ्दै गएको काठमाडौ जिल्ला प्रशासनले जनाएको छ ।
होली पर्वलाई आफ्नो घरभित्र नै सीमित गरेर मनाउन आग्रह गर्दै जिल्ला प्रशासन कार्यालय काठमाडौले कोरोना संक्रमण बढ्दो भएकाले फागू पर्वको अवसरमा सार्वजनिक स्थलमा भिडभाड नगर्न र सामाजिक, सांस्कृतिक मर्यादा अनुसार खेल्न र सार्वजनिक यातायात प्रयोग गर्दा अनिवार्य रुपमा मास्क, स्यानिटाइजर र सामाजिक एवं भौतिक दूरी कायम गरी स्वास्थ्य मापदण्डलाई परिपालना गर्न सबैलाई अनुरोधसमेत गरेको छ ।