भौतिक पूर्वाधार तथा यातायातमन्त्री वसन्तकुमार नेम्वाङलाई बिहीबार ज्ञापनपत्र बुझाउँदै नेपाल यातायात व्यवसायी राष्ट्रिय महासंघले मूल्य वृद्धिको आधारमा चैतको तेस्रो साताभित्र भाडा समायोजन गर्न सरकारसँग माग गरेको छ ।

महासंघले आफूहरूले दिएको समय सीमाभित्र भाडा समायोजन नगरिए सवारी साधन नचलाउने चेतावनीसमेत दिएको छ ।

त्यसैगरी वैकल्पिक व्यवस्था नभएसम्मका लागि प्राविधिक जाँचको आधारमा २० वर्ष अवधि पुगेका सार्वजनिक सवारी साधनहरूलाई समेत म्याद थप गरी सञ्चानल गर्ने अनुमति दिन पनि माग गरिएको छ ।

२० वर्षभन्दा पुराना सवारी साधन विस्थापित गर्ने भए नयाँ सवारी साधनका लागि सतप्रतिशत भन्सार छुट गरिदिनुपर्ने माग महासंघले राखेको छ ।

मन्त्री नेम्वाङले ज्ञापनपत्र बुझ्दै महासंघले राखेको विषयका सम्बन्धमा यातायात व्यवस्था विभागसँग आवश्यक छलफल गर्ने जनाएका छन् ।