दाङमा आर्थिक वर्ष २०७९/०८० मा २९८ वटा घरेलु तथा साना उद्योग बन्द भएका छन् ।
घरेलु तथा साना उद्योग कार्यालयका प्रमुख लालबहादुर गुरुङका अनुसार वाणिज्यतर्फ ३२३ वटा साना उद्योग बन्द भएका छन् । बन्द हुनेमा उत्पादनमूलक उद्योग ५४, पर्यटन उद्योग ४८ र सेवामूलक उद्योग ५६ वटा छन् । कार्यालयमा आएर आधिकारिक रूपमा बन्द गराउनेको सङ्ख्या न्यून भएको उनले बताए ।
जिल्लामा आर्थिक वर्ष २०७९/०८० मा ७४२ वटा घरेलु तथा साना उद्योग दर्ता भएका थिए । चालू तथा स्थिर पुँजीतर्फ १ अर्ब ४१ करोड १ लाख रुपैयाँ लगानी भएको छ । यसबाट ६३ लाख ३१ हजार रुपैयाँ राजस्व सङ्कलन भएको प्रमुख गुरुङले बताए । जिल्लामा हालसम्म ११ हजार ३८२ वटा घरेलु तथा साना उद्योग छन् ।
२०७९ असार मसान्तसम्म १० हजार ९३८ र आ.व. २०७९/०८० मा ७४२ वटा उद्योग थपिएका तथ्याङ्कले देखाएको छ । १ वर्षको अवधिमा ७१७ वटा उद्योग नवीकरण भएका छन् । ८१२ उद्यमी थपिएका छन् । २ हजार ५५३ जनाले रोजगारी प्राप्त गरेको तथ्याङ्क छ ।
उत्पादनमूलक उद्योग ७५ वटा दर्ता भएका छन् । ६९२ जनाले रोजगारी प्राप्त गरेका छन् । १८९ वटा उद्योग नवीकरण गरिएको उनले बताए ।
कृषि तथा वनजन्य उद्योगमा ४३२ वटा दर्ता भएका छन् । यसबाट १ हजार १६८ जनाले रोजगारी प्राप्त गरेका छन् । कृषि तथा वनजन्य २१८ वटा उद्योग नवीकरण भएका छन् । पर्यटन उद्योगतर्फ ८१ वटा थपिएका छन् भने ७० वटा नवीकरण भएका छन् ।
त्यस्ता उद्योगबाट ४६५ जनाले रोजगारी प्राप्त गरेका छन् । सेवामूलक २४० वटा उद्योग नवीकरण भएका छन् । वाणिज्यतर्फ ८२७ वटा फर्म दर्ता भएका छन् ।
कोभिड- १९ को प्रभावपछि वृद्धि गरिएको बैंक ब्याज, आर्थिक तरलतालगायत कारण बढीजसो उद्योग तथा वाणिज्य फर्म बन्द भएका हुन् । उद्योग तथा वाणिज्य फर्म बन्द भएपछि अहिले बजारमा व्यावसायिक सटर खाली छन् । उद्योगी तथा व्यवसायी विस्थापित भएका छन् ।
