नगरपालिकाले हेर्नुपर्ने सडकको काम उपभोक्ता समितिलाई दिएर नगरपालिकाका प्राविधिक कर्मचारीले ध्यान नदिँदा वर्षामा हिँड्न नसकिएको भन्दै राजधानीवासीले गुनासो गर्न थालेका छन् । गोकर्णेश्वर नगरपालिका- १ नयाँ पाटी पुलमाथिको कारखानाबाट बाग्मती नदी हुँदै  निस्कनेलगायत नगर क्षेत्रका भित्री सडकको अवस्था जीर्ण रहेका भन्दै नगरवासीले दुःखेसो पोखेका हुन् । 

नगरपालिकाले आर्थिक वर्ष २०७५/०७६ देखि प्रत्येक वर्ष बजेट विनियोजन गर्दै आएको वडा- १ को यस सडकमा अहिले पानी जमेर पैदल हिँड्न नसकिने अवस्थामा पुगेको स्थानीयवासी सरस्वती खड्काको गुनसो थियोे । यस सडकका नाममा नगरपालिकाको ५ आर्थिक वर्षसम्म लाखौँ रकम विनियोजन गर्दै आए पनि काम भने उपभोक्ता समितिलाई दिँदा गुणस्तरीय हुन सकेको छैन ।

उपभोक्ता समितिले मनपरी खर्च गर्दा सडकको यस्तो अवस्था भएको हो । यसतर्फ सरोकार भएका निकायको ध्यान जान नसकेको उनले बताइन् । 

सो विषयमा नगर प्रमुख दीपककुमार रिसालसँग सोध्न खोज्दा उनी सम्पर्कमा आउन चाहेनन् । उपभोक्ता समितिले आयोजनाको सूचना पार्टीसमेत नराखी अपारदर्शी रूपमा काम गर्ने गरेको स्थानीयवासीको भनाइ थियो । स्थानीयवासीको सरोकारका यी समस्या बुझेर  नगरपालिकाले काम नगर्दा वर्षामा हिलो र हिउँदमा धुलाम्ये सडक हुने भएकाले  पीडित हुनुपरेको स्थानीयवासी पार्वती पुडासैनीले बताइन् ।