बर्दियाको गुलरिया नगरपालिका र बारबर्दिया नगरपालिका जोड्ने जब्दीघाट पुल बाढीले बगाएपछि आवतजावतका लागि सास्ती भएको छ । पुल बाढीले बगाएपछि आवतजावत गर्न जोखिमपूर्ण यात्रा गर्न स्थानीय बाध्य छन् । 

बाढीले क्षतिग्रस्त बनाएको ६ वर्ष बितिसक्दा पनि पुल पुनर्निर्माण नहुँदा वर्षौंदेखि सास्ती बेहोर्दै आएको बारबर्दिया नगरपालिका- ११ का रामगोपाल थारूले बताए । 'तरकारी फल्ने र विक्री हुने यो मुख्य याम हो । बजारसम्म तरकारी पुर्‍याउन सकिएको छैन', उनले भने । पुल नहुँदा तरकारी खेतबारीमै कुहिन थालेको छ । 

अधिकांश गाउँमा बारीमा तरकारी लटरम्म फलेको छ । विक्री हुने मुख्य गुलरिया हाट बजार हो । जाने बाटो नहुँदा विक्री गर्न नसकेको बारबर्दिया- ४ का फक्लबहादुर सत्गौलाले बताए ।

१६ करोड ६८ लाख रुपैयाँमा निर्मित जब्दीघाट पुल २०७४ साउनको अन्तिम साता बबई नदीमा आएको बाढीले क्षतिग्रस्त बनाएको थियो । जब्दीघाट पुल हस्तान्तरण नहुँदै भासिएको थियो । पछिल्लो समय उक्त पुल निर्माण गर्ने कम्पनीसँग क्षतिपूर्ति असुल गरी जब्दीघाटमा नयाँ पुल निर्माणका लागि बर्दिया क्षेत्र नम्बर- १ का सङ्घीय सांसद सञ्जयकुमार गौतमले पहल गर्दै आएका छन् ।

नयाँ पुल निर्माणको माग राख्दै गौतम भत्किएको पुलमुनि गत वैशाख ३० देखि जेठ ६ गतेसम्म आमरण अनशनबसेका थिए । सांसद गौतम र भौतिक तथा पूर्वाधार तथा यातायातमन्त्री प्रकाश ज्वालाबीच १ महिनाभित्र पुल निर्माण गर्ने सम्झौता भएपछि अनशन तोडिएको थियो ।